12 மணி நேர வேலை..வாரத்திற்கு 70 மணி நேரம்...பொருளாதாரம் உயராது...செலவே அதிகரிக்கும்!

கடந்த 2023ம் ஆண்டு, இன்ஃபோசிஸ் நிறுவனர்களில் ஒருவரான நாராயணமூர்த்தி, 'நமது இளைஞர்கள் வாரம் 70 மணி நேரம் வேலை செய்வதை விரும்ப வேண்டும்' என பேட்டி ஒன்றில் குறிப்பிட்டது பெரும் சர்ச்சையை ஏற்படுத்தியது.

- பேராச்சி கண்ணன்

இந்நிலையில் சமீபத்தில் தனியார் தொலைக்காட்சி சேனல் நடத்திய ஒரு நிகழ்விலும் இந்த வேண்டுகோளை அவர் மீண்டும் வலியுறுத்தியுள்ளார்.

"இந்த நாட்டில் நாம் கடினமாக உழைக்க வேண்டும். வாழ்க்கை - வேலை சமநிலையில் எனக்கு நம்பிக்கை இல்லை. அதனால் 70 மணி நேரம் வேலை என்ற எனது பார்வையை நான் கடைசிவரை மாற்றப் போவதில்லை" எனத் தெரிவித்துள்ளார்.

இதற்கு உடனடியாக நெட்டிசன்கள் சமூக வலைதளங்களில் பதிலடி தந்தனர்.

'மன்னிக்கவும், எங்களுக்கு ஒரு வாழ்க்கை இருக்கிறது. வீட்டிலும் பணிபுரிய வேண்டும்; அலுவலகத்திலும் வேலை செய்ய வேண்டும். நீங்கள் வீட்டிலும் அப்படியல்ல. அலுவலகத்திலும் உங்களுக்காக, உங்கள் தேவைக்காக பலரும் உழைக்கிறார்கள். சமையல், டீ, இஸ்திரி போடுவது என சகலத்துக்கும் ஆட்களை வைத்திருக்கிறீர்கள்.

நாங்கள் அப்படியல்ல. வீட்டில் பால் வாங்குவது முதல் அலுவலகத்தில் எழுந்து சென்று டீ குடிப்பது வரை எங்களுக்கானதை நாங்கள்தான் செய்ய வேண்டும்.

கணவன், மனைவி இருவரும் பணிபுரிபவர் என்றால் வீட்டு வேலைகளைப் பகிர்ந்துகொள்ள வேண்டும். டிராஃபிக்கில் ஊர்ந்து ஊர்ந்து வேலைக்கு வர வேண்டும். பணிக்கு செல்லும் பெண்கள் அதிகாலையில் எழுந்து சமைப்பது முதல் சகல பணிகளையும் மேற்கொள்ள வேண்டும்.

ஒரேயொரு வேண்டுகோள். ஒரு லேத் பட்டறையில், கம்பெனியில் நீங்கள் தினமும் 12 மணிநேரம் உழைத்துக் காட்டுங்களேன்... 'என்கிறார் ஒருவர்.

இன்னொருவரோ, 'நாம் வாரத்தில் 7 நாட்கள் வேலை செய்தால் முதலாளி மகிழ்ச்சியாக இருப்பார். சம்பளம்தானே தருகிறீர்கள். ஊழியர்களுக்கு லாபத்தில் பங்குகொடுக்கிறீர்கள்? தங்கள் சுயநலத்திற்காக சமுதாயத்தை வேலைக்கு அடிமையாக்கும் இதுபோன்ற ஆட்களிடம் ஜாக்கிரதை...' எனத் தெரிவித்துள்ளார். இப்படி நிறைய கமென்ட்கள் உள்ளன.

இதுகுறித்து சிஐடியு மாநிலத் தலைவர் அ.சவுந்தரராஜனிடம் பேசினோம். "இது அப்பட்டமான லாப நோக்கம் உள்ள ஒரு வாதம்..." எனக் கடுமையாகக் கண்டித்தவர், தொடர்ந்தார்.

"வேலை நேரம் என்ற வரையறை ஒரு காலத்தில் கிடையாது. பெரிய தொழிற்சாலைகள், தொழிலாளிகள் என்ற முறை இருந்தபோது வேலை நேரத்திற்கு ஒரு வரையறையே இல்லை.