அமெரிக்காவில் கொடி கட்டிப் பறக்கும் இந்திய விவசாயி!

உலகம் முழுவதும் 10 ஆயிரம் வகையான திராட்சைகள் இருப்பதாக ஆய்வுகள் சொல்கின்றன. இவற்றில் 33 வகைகள் மட்டுமே உலகில் உள்ள 50 சதவீத திராட்சைத் தோட்டங்களில் விவசாயம் செய்யப்படுகின்றன. இதில் பிரபலமான ஒரு வகை, உலர் திராட்சை. இதன் வரலாறு ரொம்பவே ஆச்சர்யமளிக்கிறது.

- த. சக்திவேல்

சுமார் 4000 வருடங்களுக்கு முன்பு எகிப்து மற்றும் பெர்சியாவில் சுற்றிக் கொண்டிருந்த நாடோடிகளின் கண்களில்தான் முதன்முதலாக உலர் திராட்சை காட்சி தந்திருக்கிறது. அதன் சுவை பிடித்துப்போக உலர் திராட்சையை வீட்டிலேயே வளர்க்க ஆரம்பித்தான் மனிதன். இதன் அருமை நான்கு திசைகளிலும் பரவியது.  

பைபிளில் கூட உலர் திராட்சைக்கு ஓர் இடம் கிடைத்தது. கிரேக்கர்களும், ரோமானியர்களும் உலர் திராட்சைக்கு மிக உயர்வான ஓர் இடத்தைக் கொடுத்தனர். வழிபாட்டு இடங்கள் மற்றும் முக்கிய நிகழ்வுகளில் உலர் திராட்சையை வைத்து அலங்கரித்திருக்கின்றனர். அத்துடன் விளையாட்டுப் போட்டிகளில் வென்றவர்களுக்கு முதல் பரிசாக உலர் திராட்சை வழங்கப்பட்டது.

இன்று பாயாசம், கேக் உட்பட பலவிதமான இனிப்பு பண்டங்களில் இடம் பெறும் முக்கிய பொருளாக பரிணமித்திருக்கிறது உலர் திராட்சை.

இப்படியான உலர் திராட்சையைத் துருக்கியும், அமெரிக்காவும்தான் அதிகளவில் உற்பத்தி செய்கின்றன. அதாவது உலகளவில் உற்பத்தியாகும் உலர் திராட்சையில் 80 சதவீதத்தை தன்வசம் வைத்திருக்கின்றன துருக்கியும்,  அமெரிக்காவும். அடுத்த இடங்களில் ஈரான், கிரீஸ், சிலி, தென்ஆப்பிரிக்கா ஆகிய நாடுகள் உள்ளன.

அமெரிக்காவில் உலர் திராட்சை விளையும் முக்கிய இடமாகத் திகழ்கிறது கலிபோர்னியாவில் உள்ள சான் ஜோக்வின் பள்ளத்தாக்கு. அங்கேதான் உலகிலேயே அதிகமாக உலர் திராட்சைகளை உற்பத்தி செய்யும் விவசாயியான சரண்ஜித் சிங் பாத்தின் திராட்சைத் தோட்டங்கள் வரிசை கட்டி நிற்கின்றன.

இந்தியாவில் பிறந்து அமெரிக்காவில் வசித்து வரும் பணக்கார விவசாயி இவர். மிகப்பெரிய பஞ்சாபி - அமெரிக்க விவசாயியும் இவரே. உலர் திராட்சையின் முடிசூடா மன்னன் என்று வர்ணிக்கப்படுகிறார் சரண்ஜித் சிங் பாத். சுருக்கமாக பாத்.