K-TET നിബന്ധന ആശങ്കപ്പെടാനുണ്ടോ?

സർവീസിലുള്ള എല്ലാ അധ്യാപകരും 2027 സെപ്റ്റംബർ 1നകം കെ-ടെറ്റ് നേടിയിരിക്കണമെന്ന സുപ്രീം കോടതി വിധിയുടെ പശ്ചാത്തലം എന്താണ്? വിധിയിൽ പുനഃപരിശോധന സാധ്യമാണോ? വിദ്യാഭ്യാസ വിദഗ്ധനായ ഡോ. വി.ബാലകൃഷ്ണൻ വിശദീകരിക്കുന്നു.

- ഡോ. വി.ബാലകൃഷ്ണൻ

സർവീസിലുള്ള അധ്യാപകർക്കും കെ-ടെറ്റ് യോഗ്യത നിർബന്ധമാക്കി സുപ്രീം കോടതി വിധി വന്നത് ഇക്കഴിഞ്ഞ സെപ്റ്റംബർ 1നാണ്. ഇതോടെ, സെറ്റ്, നെറ്റ് ഉൾപ്പെടെ വിവിധ അധികയോഗ്യതകൾ ഉള്ളവരും കെ-ടെറ്റ് എഴുതണോ എന്ന ആശങ്ക ഉയർന്നു. കെ-ടെറ്റ് നടപ്പാക്കും മുൻപു സർവീസിൽ കയറിയവരും അനിശ്ചിതത്വത്തിലാണ്. ഇന്ത്യയിൽ 20 ലക്ഷത്തോളം അധ്യാപകരെയും കേരളത്തിൽ 65,000 അധ്യാപകരെയും ഈ വിധി ബാധിക്കും.

2009 ഓഗസ്റ്റ് 4നാണ് കേന്ദ്രം Right to Education (RTE) ആക്ട് പാസാക്കുന്നത്. 2010 ഏപ്രിൽ 1നു നിലവിൽ വന്നു. 6 മുതൽ 14 വരെ വയസ്സുള്ള കുട്ടികൾക്കു സൗജന്യവും നിർബന്ധിതവുമായ വിദ്യാഭ്യാസം ഉറപ്പുനൽകുന്നതാണ് ഈ നിയമം. ഗുണമേന്മയുള്ള വിദ്യാഭ്യാസം ഉറപ്പുവരുത്തുകയും ഇതിന്റെ ലക്ഷ്യമാണ്.

ഗുണമേന്മയുള്ള വിദ്യാഭ്യാസത്തിന് ഗുണമേന്മയുള്ള അധ്യാപകർ വേണം. ഇത് ഉറപ്പുവരുത്തുന്നതിന്റെ ഭാഗമായാണ് സർവീസിലുള്ള അധ്യാപകർക്കുകൂടി കെ-ടെറ്റ് യോഗ്യത നിർബന്ധമാക്കി സുപ്രീം കോടതി ഡിവിഷൻ ബെഞ്ച് ഉത്തരവു പുറപ്പെടുവിച്ചത്.

ഈ വിധിപ്രകാരം രണ്ടു വർഷത്തിനുള്ളിൽ, അതായത് 2027 സെപ്റ്റംബർ 1നു മുൻപ്കെ -ടെറ്റ് യോഗ്യതയില്ലാത്ത അധ്യാപകർ അതു നേടിയിരിക്കണം. RTE ആക്ട് പാസാകും മുൻപു ജോലിയിൽ പ്രവേശിച്ച അധ്യാപകർ കൂടി ആ യോഗ്യത നേടണമെന്നർഥം.