ജ്വാലാമുഖിക്ഷേത്രത്തിലെ ഒരിക്കലുമണയാത്ത ദീപജ്ജ്വാല

യാത്ര

- മിനി മോഹനൻ

വർഷങ്ങൾക്കുമുൻപു നടത്തിയ ഉത്തരേന്ത്യൻ യാത്രയിലാണ് ആ അത്ഭുതദൃശ്യം കാണാനുള്ള ഭാഗ്യം ലഭിച്ചത്. സഹസ്രാബ്ദങ്ങളായി എരിഞ്ഞു കൊണ്ടിരിക്കുന്ന ഒരഗ്നിജ്വാല. ഒന്നല്ല, വേറെ ഒൻപത് അഗ്നി നാളങ്ങൾ കൂടെ നമുക്കവിടെക്കാണാം. അതേ, അതാണ് ഹിമാചൽപ്രദേശിലെ ക്ഷേത്രം ശിവാലിക് പർവ്വതനിരകളിലെ കാംഗ്ര പ്രദേശത്തുള്ള ജ്വാലാമുഖി (ജ്വാലാജി ക്ഷേത്രമെന്നും ഇതറിയപ്പെടുന്നു). കാംഗ്ര ജില്ലയുടെ ആസ്ഥാനമായ ധരംശാല പട്ടണത്തിൽനിന്ന് അമ്പതു കിലോമീറ്ററോളം ദൂരമേയുള്ളൂ ഈ പ്രസിദ്ധമായ ക്ഷേത്രത്തിലേക്ക്.

ജ്വാലാമുഖിക്ഷേത്രം, ഭാരതത്തിലെ ശക്തിപീഠങ്ങളിൽ ഏറെ തേജസ്സാർ ന്ന ഒൻപതു ക്ഷേത്രങ്ങളിലൊന്നാണ്. ആദിപരാശക്തിയെ, സതിയുടെ ശരീര പിണ്ഡങ്ങളുടെ രൂപത്തിൽ പ്രതിഷ്ഠിച്ചിരിക്കുന്ന ഭഗവതീക്ഷേത്രങ്ങളാണ് ശക്തി പീഠങ്ങൾ. മഹേശ്വരസംഗമത്തിനായി, ദക്ഷപുത്രിയായ സതിയുടെ ജന്മമെടുക്കുകയായിരുന്നു ആദിപരാശക്തി. സതീദേവി പിതാവിന്റെ ഇച്ഛയ്ക്കു വിപരീതമായി പര മശിവനെ വിവാഹം ചെയ്തു. ഇക്കാരണം കൊണ്ടു പുത്രിയോടും ജാമാതാവിനോടും ദക്ഷപ്രജാപതി ശത്രുതവെച്ചുപുലർത്തി. താൻ നടത്തിയ മഹായാഗത്തിലേക്ക് ഇവരിരുവരുമൊഴികെ മറ്റെല്ലാവരേയും ക്ഷണിക്കുകയും ചെയ്തു. എങ്കിലും തന്റെ പിതാവു നടത്തുന്ന മഹായജ്ഞത്തിൽ സംബന്ധിക്കുവാനുള്ള ആഗ്രഹം സതി ശിവനെ അറിയിച്ചു. സതിയെ താത ഗൃഹത്തിലേക്കു പോകുന്നതിൽ നിന്നു പിൻതിരിപ്പിക്കാൻ പരമാവധി ശ്രമിച്ചെങ്കിലും ഒടുവിൽ ആ നിശ്ചയദാർഢ്യത്തിനു മുന്നിൽ ശിവനു വഴങ്ങേണ്ടിവന്നു.

മനസ്സില്ലാമനസ്സോടെ യാത്രാനുമതി നൽകിയ ശിവൻ തന്റെ വാഹനമായ നന്തിയേയും ഗണങ്ങളേയും പ്രേയസിയോടൊപ്പം അയച്ചു. എന്നാൽ സതിക്ക് സ്വഗൃഹത്തിൽ ഒരാദരവും ദക്ഷൻ നൽകിയില്ല. എന്നതു മാത്രമല്ല ശിവനെ അപമാനിക്കുന്ന ഭാഷണങ്ങളാണ് അവിടെ നിന്നും കേൾക്കാനിടയായതും. ഈ കടുത്ത അപമാനം സതിദേവിക്കു സഹിക്കാൻ കഴിയുമായിരുന്നില്ല. ദാക്ഷായണിയായതാണ് തന്നിലെ അപരാധമെന്നു സതി വിലപിച്ചു. യജ്ഞഭൂമിയിൽ വെച്ച്തന്റെ യോഗശക്തിയിൽ നിന്നുദ്ഭവിച്ച അഗ്നിയിൽ സതി പ്രാണത്യാഗം ചെയ്തു.