ICONIC CLASSIC

പുതിയ എൻജിനടക്കമുള്ള പരിഷ്കാരങ്ങളുമായി ജാവയുടെ ക്ലാസിക് താരം

- 

ഇന്ത്യൻ മണ്ണിലേക്കുള്ള തിരിച്ചുവരവിൽ തങ്ങളുടെ ക്ലാസിക് മോഡലിന്റെ തനി പകർപ്പുമായാണ് ജാവ രംഗത്തെത്തിയത്. ഇപ്പോഴിതാ ജാവ പ്രേമികളുടെ മനം കവർന്ന മോഡലിനെ പരിഷ്കരിച്ചിറക്കിയിരിക്കുകയാണ് കമ്പനി. മാറ്റമെന്തെന്നു നോക്കാം.

ക്ലാസിക് ലുക്ക്

ഒറ്റനോട്ടത്തിൽ നിലവിലുണ്ടായിരുന്ന ക്ലാസിക്കിന്റെ ഡിസൈനിൽ നിന്നു കാര്യമായ മാറ്റം പറയാനില്ല. എന്നാൽ എന്നെയൊന്നു സൂക്ഷിച്ചു നോക്കിക്കേ,' എന്നു പപ്പു പറഞ്ഞതുപോലെ കാര്യമായി നോക്കിയാൽ മാറ്റം അറിയാൻ കഴിയും.

പുതിയ മിസ്റ്റിക് ഓറഞ്ചുനിറവും ക്രോം ഫിനിഷും മൊത്തത്തിലുള്ള കാഴ്ചയിൽ ക്ലാസ് ലുക്കാണ് സമ്മാനിക്കുന്നത്. ഓരോ പാർട്ടുകളിലൂടെയും കണ്ണോടിച്ചാൽ ക്വാളിറ്റി കൂടിയതായി കാണാം. കേബിളുകളെല്ലാം ഭംഗിയായി പാക്ക് ചെയ്തിരിക്കുന്നതും പാർട്ടുകളുടെ ചേർപ്പും ഫിനിഷുമെല്ലാം ഉദാഹരണം. സ്വിച്ച് ഗിയറിന്റെ കാര്യത്തിൽ മാത്രമാണ് ചെറിയ നിരാശ. 125, 150സിസി ബൈക്കുകളുടെ നിലവാരമേ ഇതിനുള്ളൂ.