സുഗന്ധം നിറയുന്ന മ്യൂസിയം

മട്ടാഞ്ചേരിയിലെ അബ്ദുൾ റഷീദിന്റെ പെർഫ്യൂം മ്യൂസിയത്തിൽ എത്തിയാൽ ശ്വസിച്ചറിയാം 'വാസനകളുടെ കഥകൾ

- ഡെൽന സത്യരത്ന

അബ്ദുൾ റഷീദ് ആ തോൽക്കുപ്പി തുറന്നു. അപ്പോൾ പുറത്ത് ചുട്ടുപൊള്ളുന്ന വെയിലാണെന്നു മറന്നു പോയി. പുതുമഴ പെയ്തു നനഞ്ഞു വരുന്ന മണ്ണിന്റെ ഗന്ധം മൂക്കിൽ നിറഞ്ഞു.

അങ്ങനെ നൂറു കണക്കിനു സുഗന്ധങ്ങളുടെ കഥയാണ് കുപ്പികളിലായി ഇവിടെ നിറഞ്ഞിരിക്കുന്നത്. മട്ടാഞ്ചേരിയിലെ പെർഫ്യൂം മ്യൂസിയത്തിലെത്തിയാൽ സുഗന്ധങ്ങളുടെ ചരിത്രം കൺമുന്നിൽ സിനിമ പോലെ തെളിയും. എസൻഷ്യൽ ഓയിലുകളുടെ ഗാലറിയിൽ മിർ, ഊദ്, വെട്ടിവെർ തുടങ്ങി വിലയേറിയ വിരുതന്മാർ മുതൽ സ്ട്രോബെറിയും ചെറിയും ട്യൂലിപും നാരങ്ങയും കറുവാപ്പട്ടയും വരെയുണ്ട്.

മിനുത്ത ചില്ലുകുപ്പിക്കുള്ളിൽ നിറഞ്ഞിരുന്ന് കിരീടം പോലെ പ്രൗഢിയുള്ള അടപ്പിനെ തൊട്ടഭിമാനിച്ച് എണ്ണമില്ലാത്തത് എണ്ണകളുടെ ശേഖരം. ഓരോന്നും സന്ദർശകർക്കു മണത്തു നോക്കാം. സന്ദർശകർക്ക് ഇഷ്ടമുള്ള ഗന്ധങ്ങൾ പറഞ്ഞാൽ അതു മിക്സ് ചെയ്ത് ഉണ്ടാക്കിയെടുക്കാനാകും. അതിനായി പെർഫ്യൂം ലാബ് എന്ന പ്രത്യേക ഏരിയയും മ്യൂസിയത്തിലുണ്ട്.