സാ മാം പാതു സരസ്വതി

എറണാകുളം ജില്ലയിലെ വടക്കൻ പറവൂരിലുള്ള ദക്ഷിണമൂകാംബിക ക്ഷേത്രത്തിലെ വിശേഷങ്ങൾ

- ശില്പ ബി. രാജ്

പ്രഭാതകിരണങ്ങളെ എതിരേൽക്കാനൊരുങ്ങുന്ന പൊയ്കയിൽ മെല്ലെ ഉലയുന്ന പാതിവിടർന്ന താമരമൊട്ടുകൾ. തണുപ്പുള്ള ഇളംകാറ്റിനു ചന്ദനത്തിന്റെയും താമരപ്പൂവിന്റെയും സുഗന്ധം. പൊയ്കയുടെ നടുവിലായി പണിതീർത്ത ശ്രീകോവിലിനുളളിൽ നിറദീപങ്ങളുടെ പ്രഭയിൽ വിദ്യാവിലാസിനി സരസ്വതീദേവിയുടെ മനോഹരരൂപം. ക്ഷേത്രത്തിൽ എതിരേറ്റു പൂജയുടെ സമയമായി. സൂര്യരശ്മികൾ ഭൂമിയിൽ പതിച്ചു തുടങ്ങുന്ന നേരത്താണ് എതിരേറ്റു പൂജ അഥവാ എതിർത് പൂജ നടക്കുന്നത്.

"പദ്മപത വിശാലാക്ഷീ
പദ്മകേസര വർണിനീ
നിത്യം പദ്മാലയാം ദേവീ
സാ മാം പാതു സരസ്വതീ...

പ്രകൃതി പോലും ഭക്തിയിൽ അലിയുന്ന നിമിഷങ്ങളിൽ സരസ്വതീസ്തുതികൾ ഉയരുന്നു.

എറണാകുളം ജില്ലയിലെ വടക്കൻ പറവൂർ ദക്ഷിണ മൂകാംബിക ക്ഷേത്രത്തിൽ ജഗത്മാതാവായ ആദിപരാശക്തി മഹാസരസ്വതീഭാവത്തിൽ കുടികൊള്ളുന്നു എന്നാണു വിശ്വാസം. കർണാടകയിലെ കൊല്ലൂർ മൂകാംബിക ക്ഷേത്രത്തിന്റെ ദക്ഷിണഭാഗത്തു (തെക്ക്) സ്ഥിതി ചെയ്യുന്നതിനാലാണ് ഇവിടം ദക്ഷിണ മൂകാംബിക എന്നു പ്രസിദ്ധമായത്.

അരയാലിലകൾക്കിടയിലൂടെ നൂണ്ടിറങ്ങുന്ന പുലർവെയിൽ മുറ്റത്തു ചിത്രങ്ങളെഴുതിത്തുടങ്ങുന്നു. നവരാത്രിപൂജയ്ക്കുള്ള തകൃതിയായ ഒരുക്കങ്ങൾ ക്ഷേത്ര പരിസരത്തു കാണാം. ഇനി ഇവിടത്തെ ഓരോ മണൽത്തരിയും ഹരിശ്രീ കുറിക്കുവാനെത്തുന്ന കുരുന്നുകൾക്കായുള്ള കാത്തിരിപ്പിലാകും.

“മനസ്സിരുത്തി വിളിച്ചാൽ എന്തും നൽകുന്ന അമ്മയാണിവിടെ. സാക്ഷാൽ മൂകാംബിക ഭഗവതി.'' ക്ഷേത്രത്തിനോടു ചേർന്നുള്ള പന്തലിൽ ദേവീമാഹാത്മ്യം വായിച്ചു കൊണ്ടിരുന്ന മുത്തശ്ശി ഭക്തിയോടെ പറയുന്നു. “പഠിക്കുന്ന കുട്ടികളെയും കലാകാരന്മാരെയും അകമഴിഞ്ഞ് അനുഗ്രഹിക്കുന്ന ദേവി. നവരാത്രി ദിവസങ്ങളിൽ പറഞ്ഞറിയിക്കാനാകാത്തത്ര തിരക്കായിരിക്കും. ദൂരെ ദിക്കുകളിൽ നിന്നു പോലും ആളുകൾ അമ്മയുടെ കടാക്ഷത്തിനായി വന്നു ചേരും.

ഭക്തപ്രിയയായ ഭഗവതി