വെജിറ്റേറിയൻസിന് എല്ലാ വൈറ്റമിനുകളും ലഭിക്കുമോ?

സോഷ്യൽമീഡിയ വഴി പ്രചരിക്കുന്ന ആരോഗ്യ സംബന്ധമായ തെറ്റിധാരണകൾ അകറ്റാം. കൃത്യമായ വിശദീകരണങ്ങളുമായി ഡോ.ബി.പത്മകുമാർ പ്രഫസർ, മെഡിസിൻ, മെഡിക്കൽ കോളജ്, ആലപ്പുഴ

-  ഡോ.ബി.പത്മകുമാർ പ്രഫസർ, മെഡിസിൻ, മെഡിക്കൽ കോളജ്, ആലപ്പുഴ

വെജിറ്റേറിയൻ ആകുന്നത് ആരോഗ്യജീവിതത്തിലേക്കുള്ള ആദ്യ ചവിട്ടുപടി ആയാണു പൊതുവെ കണക്കാക്കാറുള്ളത്. റെഡ്മീറ്റും വറുത്തതും പൊരിച്ചതുമായ സസ്യേതര വിഭവങ്ങളും കഴിച്ച്, അമിതകൊഴുപ്പിന്റെയും പൊണ്ണത്തടിയുടെയും പ്രശ്നങ്ങൾ വ്യാപകമാകുന്ന സാഹചര്യത്തിൽ ഇതൊരു പരിധി വരെ ശരിയാണ്.

പഴങ്ങളും പച്ചക്കറികളും ഇലക്കറികളുമടങ്ങിയ സസ്യ ഭക്ഷണത്തിൽ നാരുകളും പോഷകങ്ങളും സമൃദ്ധമായടങ്ങിയിട്ടുണ്ട്. എന്നാൽ പൂർണ സസ്യഭുക്കാകുമ്പോൾ ശരീരത്തിനാവശ്യമായ പല സൂക്ഷ്മ പോഷകങ്ങളും നമുക്കു ലഭിക്കാതെ വരാം. അതിൽ പ്രധാനമാണു ബി കോംപ്ലക്സ് വൈറ്റമിനായ ബി-12. വളരെ വേഗം വിഭജിക്കുന്ന സ്വഭാവ മുള്ള ചുവന്ന രക്താണുക്കളുടെയും നാഡീകോശങ്ങളുടെയും പ്രവർത്തനത്തിനു ജീവകം ബി-12 വേണം. മത്സ്യം, മാംസം, മുട്ട, പാൽ, പാൽ ഉൽപ്പന്നങ്ങൾ തുടങ്ങിയവയാണു വൈറ്റമിൻ ബി 12 സ്രോതസ്സുകൾ. അതുകൊണ്ടാണു പാലു പോലും കുടിക്കാത്ത കർശന വെജിറ്റേറിയൻസിനു (വീഗൻസ്) വൈറ്റമിൻ ബി 12 അഭാവമുണ്ടാകുന്നത്.