മരണം കൊണ്ടുവരുന്ന ലഹരി

രാസലഹരി പുതുതലമുറയിൽ പിടിമുറുക്കുന്നു. കൈവിട്ടു പോകും മുൻപ് പഠനം നിലച്ച്, ജീവിതം കൗമാരത്തിനു നൽകാം കൈത്താങ്ങ്

- ഡോ. വർഗീസ് പുന്നൂസ് സൈക്യാട്രി വിഭാഗം മേധാവി, ഗവ.മെഡിക്കൽ കോളജ്, കോട്ടയം.

കെട്ടിടത്തിനു മുകളിൽ നിന്നു ചാടി മരിക്കാൻ ശ്രമിച്ചതിനാണ് ബിബിനെ (യഥാർഥ പേരല്ല) കോട്ടയം മെഡിക്കൽ കോളജ് കാഷ്വാലിറ്റിയിലെത്തിച്ചത്. കയ്യും കാലുമൊടിഞ്ഞ് ആശുപത്രിക്കിടക്കയിൽ കിടന്ന അവന്റെ കണ്ണുകളിൽ മരണഭയത്തെക്കാൾ വലിയ പേടി ഉണ്ടായിരുന്നു. സംശയം തോന്നി ഡോക്ടർ അന്വേഷിച്ചപ്പോഴാണ് ആ ചാട്ടത്തിന്റെ കാരണം തുറന്നു പറഞ്ഞത്.

എപ്പോഴും എന്തൊക്കെയോ ശബ്ദങ്ങൾ മുറിക്കു പുറത്തു കേൾക്കുമത്രേ. ആരോ ആക്രമിക്കാൻ വരുന്നതാണ്. ആ പേടികൊണ്ട് പഠിക്കാൻ പോലും പറ്റുന്നില്ല. പ്ലസ് ടു  ഓണ പരീക്ഷ അടുത്തുവരുന്ന ടെൻഷൻ വേറെയും. രക്ഷപ്പെടാനുള്ള ഏകമാർഗമായി മനസ്സു പറഞ്ഞു കൊടുത്തത് ഇറങ്ങിയോടാനാണ്. ഓടി ടെറസ്സിലെത്തി. പിന്നാലെയെത്തുന്നവരുടെ കയ്യിൽ പെടുന്നതിലും ഭേദം ചാടുന്നതാണെന്നും മനസ്സ് പറഞ്ഞു, പിന്നെ “ഒറ്റച്ചാട്ടം.

വിശദമായ പരിശോധനയിൽ അവന്റെ മുറിയിൽ നിന്ന് സ്റ്റാംപ് രൂപത്തിലുള്ള മയക്കുമരുന്ന് കണ്ടെത്തി. മകൻ മുറിയടച്ചിരുന്നു പഠിക്കുന്നു എന്നു കരുതിയിരുന്ന അച്ഛനമ്മമാരുടെ ആത്മാഭിമാനം' ചീട്ടുകൊട്ടാരം പോലെ തകർന്നു. അതു ചിന്തിച്ച് അമ്മ ആത്മഹത്യയ്ക്കു ശ്രമിച്ചു.

ഇത് ഒരു കൗമാരക്കാരന്റെ മാത്രം കഥയല്ല. നമ്മുടെ നാട്ടിൽ എംഡിഎംഎ പോലുള്ള രാസലഹരിക്ക് അടിമപ്പെടുന്ന കൗമാരക്കാരുടെ എണ്ണം ദിനംതോറും വർധിക്കുകയാണെന്ന് കണക്കുകൾ പറയുന്നു. കൗമാരം ഈ ലഹരിയുടെ പിടിയിലാകാതെ കരുതലെടുക്കണം. അതിനു രക്ഷിതാക്കളും അധ്യാപകരും നമ്മളോരോരുത്തരും ചെയ്യേണ്ട നിരവധി കാര്യങ്ങളുണ്ട്.

പ്രശ്നം ചെറുതല്ല

കുട്ടികളുടെ രാസലഹരി ഉപയോഗം സംബന്ധിച്ച കേസുകളുടെ എണ്ണത്തിൽ കഴിഞ്ഞ അഞ്ചുവർഷമായി വർധനവാണ് കാണിക്കുന്നത്. കോവിഡ് കാലത്തിനു ശേഷം ഈ കേസുകളിൽ കുതിച്ചുചാട്ടമുണ്ടായെന്ന് കോട്ടയം ഗവ. മെഡിക്കൽ കോളജ് സെക്യാട്രി വിഭാഗം മേധാവിയും കുട്ടികളുടെ മാനസികാരോഗ്യ വിദഗ്ധനുമായ ഡോ. വര്‍ഗീസ്‌ പുന്നൂസ്‌ പറയുന്നു. പുതുതലമുറ കൗമാരക്കാരില്‍  മയക്കുമരുന്നുപയോഗം കൂടുന്നുവെന്ന്‌ ഉറപ്പിച്ചു പറയാനാകും.