ചട്നിമാമിയും തോഴിമാരും...പിന്നെ കുറച്ച് അടുക്കള വിശേഷങ്ങളും

ലേഡീസ് ഒൺലി, പെൺകരുത്ത്, സ്ത്രീശാക്തീകരണം എന്നൊക്കെ പലരും പലതിനേയും കുറിച്ച് പറയാറുണ്ടെങ്കിലും പലതും കടലാസിൽ ഒതുങ്ങുന്നതാണ് പതിവ്. എന്നാൽ അതിൽ നിന്നും വ്യത്യസ്തമായി ഒരു പെൺകൂട്ടായ്മ തങ്ങളുടെ കഴിവ് തെളിയിക്കുകയാണ് ചട്നിമാമിയിൽ.

- അനീഷ് മോഹനചന്ദ്രൻ

ഇവിടെ കാര്യങ്ങൾ നോക്കി നടത്തുന്നതിൽ അധികവും പെണ്ണുങ്ങളാണ്. അടുക്കളയിലെ ചിട്ടവട്ടങ്ങൾ മുതൽ സർവ്വീസ് അക്കൗണ്ട്സ്, സ്റ്റോർ കീപ്പിംഗ്, വാഷിംഗ്, ക്ലീനിംഗ്, വാട്ടർ സപ്ലേ, എച്ച്.ആർ, പി.ആർ തുടങ്ങി ഒട്ടുമിക്ക സെക്ഷനുകളിലും പെൺകരുത്ത് പ്രകടം. വൃത്തിയും വെടിപ്പും ഗുണനിലവാരവും സ്ഥാപനത്തിന്റെ മുഖമുദ്രയാണ്. അതിനായി ഹൈലി ടാലന്റഡ് ആയ പ്രൊഫഷണൽസിനെ ഇറക്കുമതിയൊന്നും ചെയ്തിട്ടില്ല. എല്ലാവരും ഒരു പഞ്ചായത്തിൽ നിന്നുള്ള സാധാരണക്കാരായ സ്ത്രീകൾ തന്നെ. അവരെ കണ്ടെത്തിയതും പരിശീലിപ്പിച്ചതും ഒക്കെ അതേ നാട്ടുകാർ തന്നെയാണ് പറഞ്ഞുവരുന്നത് തിരുവനന്തപുരം കിളിമാനൂരിന് സമീപത്തെ പുളിമാത്ത് വില്ലേജിൽ സ്ഥിതി ചെയ്യുന്ന ചട്നി മാമി വെജിറ്റേറിയൻ റസ്റ്റോറന്റിലെ വിശേഷങ്ങളെക്കുറിച്ചാണ്.

പേരുപോലെ തന്നെ വ്യത്യസ്തമാണ് ഇവിടുത്തെ ഓരോ കാര്യങ്ങളും. കൺവെൻഷണൽ മെത്തേഡ്സിൽ നിന്നും മാറി സഞ്ചരിക്കുന്ന ചട്നി മാമി കേരളത്തിലെ ആദ്യത്തെ ഗ്രീൻ ബിൽഡിംഗ് വെജിറ്റേറിയൻ റസ്റ്റോറന്റാണ്. തിരുവനന്തപുരത്തുനിന്നും എം.സി. റോഡിലൂടെ കോട്ടയം ഭാഗത്തേയ്ക്ക് യാത്ര ചെയ്യുമ്പോൾ കിളിമാനൂർ എത്തുന്നതിന് മൂന്നുകിലോമീറ്റർ മുന്നേയാണ് (കൃത്യമായി പറഞ്ഞാൽ കാരേറ്റിനും കിളിമാനൂരിനും മദ്ധ്യേ ചട്നിമാമി സ്ഥിതി ചെയ്യുന്നത്. മികച്ച ഭക്ഷണസംസ്കാരത്തിന് പേരുകേട്ട വഴിയോരക്കട’(കിളിമാനൂർ) എന്ന ഭക്ഷണശാലയുടെ അണിയറക്കാർ തന്നെയാണ് ചട്നിമാമിക്കും പിന്നിൽ പ്രവർത്തിക്കുന്നത്.

ചട്നി മാമിയുടെ പ്രത്യേകതകളെക്കുറിച്ച് പ്രൊമോട്ടർമാരിൽ ഒരാളായ മഹേഷ് മണിരാജ് പറയുന്നത് ഇങ്ങനെ നമ്മുടെ കസ്റ്റമേഴ്സ് ഭക്ഷണം കഴിക്കുമ്പോൾ അവരുടെ വയറും മനസ്സും നിറയണം. അത് ഞങ്ങൾക്ക് നിർബന്ധമാണ്. എല്ലാത്തിനുമുപരി സീറോ ഫുഡ് വേസ്റ്റേജ് എന്നൊരു ആശയവും നമ്മൾ പ്രൊമോട്ട് ചെയ്യുന്നുണ്ട്. അതായത് ഒരു നുള്ളു ഭക്ഷണം പോലും ആരും പാഴാക്കരുത് എന്ന് ഞങ്ങൾക്ക് നിർബന്ധമാണ്. 365 ദിവസവും സദ്യ ലഭിക്കുന്ന ഭക്ഷണശാലയാണ് ചട്നി മാമി. ഇവിടെ ഒരു വറ്റുപോലും ബാക്കിവയ്ക്കാതെ സദ്യ കഴിക്കുന്ന കസ്റ്റമേഴ്സിന് ഞങ്ങൾ ഒരു ഇളനീർ പുഡിംഗ് കോംപ്ലിമെന്റായി നൽകാറുണ്ട്.