ഓണം, മഹത്വവും മഹിമയും

ഓണത്തിന്റെ വിശേഷങ്ങളും വിശ്വാസങ്ങളും അങ്ങനെ നീളുകയാണ്. അനവധി വാക്കുകൾ ഓണത്തെ പ്രകീർത്തിക്കുന്ന ഈ തിരുവോണനാളിൽ ഏവരിലും ഐശ്വര്യം നിറയ്ക്കട്ടെ

- കൈലാസ് നാരായണൻ

ആവർത്തന വിരസത തോന്നാത്ത ഒരു ആഘോഷം തന്നെയാണ് ഓണം. പത്രങ്ങളും മാസികകളും ചാനലുകളും ഓണവിശേഷങ്ങളുമായി നമ്മുടെ മുന്നിൽ എത്താറുണ്ട്. അതേ, നാമെല്ലാം കൗതുകത്തോടെത്തന്നെ, പുതുതായി കാണുന്നതുപോലെ തന്നെ വിരസതയില്ലാതെ ഓണക്കാഴ്ചകൾ കാണാറുണ്ട്. മലയാള മനസ്സിനെ ഇത് ഏറെ സ്വാധീനിച്ച മറ്റൊരാഘോഷവുമില്ല. നല്ല ചിന്തകളെ എല്ലാം ഓണത്തോട് ചേർത്തു വെച്ചു പറയാൻ നാം കാട്ടുന്ന വ്യഗ്രത തന്നെയാണ് ഓണത്തിന്റെ മഹത്വവും മഹിമയും.

ഓണത്തിന്റെ വൈവിധ്യങ്ങളിലേയ്ക്ക് ഇറങ്ങിച്ചെല്ലുമ്പോൾ അതിശയകരമായ അനവധി അനവധി ആചാര വൈവിധ്യങ്ങളിലൂടെയാണ് തിരുവോണ ആചാരങ്ങൾ കടന്നുപോകുന്നത്. ഓരോ ഗ്രാമത്തിനും ഗ്രാമത്തിന്റേതായ ഓണാ ചാരങ്ങളുണ്ട്. എന്നാൽ ഓരോ വീടുകളിലും അവരുടെ കുലാചാരപ്രകാരമുള്ള ഓണവിശേഷവുമുണ്ട്. തിരുവോണനാളിൽ പ്രത്യേകമായി പാചകം ചെയ്യുന്ന ചില വിഭവങ്ങൾ കൂടി നമ്മുടെ ഓണച്ചടങ്ങിൽ പലയിടങ്ങളിലും കാണാറുണ്ട്.