ഹൃദയത്തിൽ പെയ്തിറങ്ങിയ നിലാവ്

നാടകത്തിൽ നിന്നും സിനിമയിലെത്തിയ മലയാളികളുടെ പ്രിയനടി കണ്ണൂർ ശ്രീലത തന്റെ ജീവിതാനുഭവങ്ങൾ മഹിളാരത്നം വായനക്കാരുമായി പങ്കുവയ്ക്കുകയാണ്.

- എ.എൻ. മനയ്ക്കൽ

മാനസികമായി തളർന്നു. മനസ്സിന്റെ താളം തെറ്റുന്നതിനിടയിൽ തന്നെ മനസ്സിലാക്കാനോ, സ്നേഹിക്കുവാനോ, സഹായിക്കുവാനോ ആരുമില്ലെന്ന് മനസ്സിലാക്കിയ നിമിഷം.

ജീവിതം അവസാനിപ്പിക്കാനുള്ള തീരുമാനമെടുത്ത് കണ്ണൂർ കോടതി ബസ് സ്റ്റോപ്പിൽ ആരോടൊക്കെയോ ഉള്ള അമർഷവും പുകഞ്ഞ് ബസ്സ് കാത്തുനിൽക്കുമ്പോഴാണ് പ്രകാശൻ വീണ്ടും മുന്നിലെത്തുന്നത്.

സുഖമല്ലേ... എന്ന ചോദ്യത്തിന് മുന്നിൽ ഒരു പൊട്ടിത്തെറിയായിരുന്നു പ്രകാശന് ലഭിച്ചത്. വളരെ ശാന്തനായി നിന്നുകൊണ്ട് പ്രകാശൻ ശ്രീലതയോട് പറഞ്ഞു. ഞാൻ നിന്റെ ആ പഴയ ആത്മമിത്രമാണ്. നിന്റെ ദുരന്തവും അവസ്ഥയും മനസ്സിലായി. വിശ്വാസമുണ്ടെങ്കിൽ കൂടെ വരിക, കുറച്ച് സംസാരിക്കാനുണ്ട്. ശ്രീലത തണുത്തു.

നാടകത്തിൽ നിന്നും സിനിമയിലെത്തിയ മലയാളികളുടെ പ്രിയനടി കണ്ണൂർ ശ്രീലത തന്റെ ജീവിതാനുഭവങ്ങൾ മഹിളാരത്നം വായനക്കാരുമായി പങ്കുവയ്ക്കുകയാണ്.

കണ്ണൂർ മുഴപ്പിലങ്ങാട് സ്വദേശിയായ പ്രശസ്ത നാടകരചയിതാവും സംവിധായകനുമായിരുന്ന രാജന്റെയും വാസന്തിയുടെയും നാല് മക്കളിൽ മൂത്തമകൾ. വളരെ ചെറിയ പ്രായത്തിൽ തന്നെ അച്ഛന്റെ നാടകസംഘമായ രാജാ തിയേറ്റേഴ്സിൽ അഭിനയിച്ചു തുടങ്ങി. പതിമൂന്നാ മത്തെ വയസ്സിൽ തന്നെ നാടകരംഗത്ത് അറിയപ്പെടുന്ന നടിയായി ശ്രീലത വളർന്നു. അലവിൽ ദേശീയ കലാസമിതി നാടകസംഘത്തിലൂടെയാണ് കൂടുതലും അറിയപ്പെട്ടത്.

നന്ദി വീണ്ടും വരിക എന്ന നാടകത്തിലൂടെ സംസ്ഥാന സർക്കാരിന്റെ അവാർഡും ശ്രീലതയെ തേടിയെത്തി. ആ സമയത്താണ് ബാലചന്ദ്രമേനോന്റെ പ്രശ്നം ഗുരുതരം എന്ന സിനിമയുടെ ഷൂട്ടിംഗ് കണ്ണൂരിൽ നടക്കുന്നത്. കണ്ണൂർ ശ്രീലതയുടെ ഫോട്ടോ പത്രത്തിൽ കണ്ട ബാലചന്ദ്രമേനോൻ ശ്രീലതയ്ക്ക് സിനിമയിൽ അവസരം നൽകി. അങ്ങനെ നാടകത്തിൽ നിന്നും സിനിമയിൽ ഹരിശ്രീ കുറിച്ചു. തുടർന്ന് കാണാമറയത്ത്, അപ്പുണ്ണി, തമ്മിൽ തമ്മിൽ. 80 കളിലും 90 കളിലും ചലച്ചിത്ര ലോകത്ത് സജീവമായ കണ്ണൂർ ശ്രീലത ടെലിവിഷൻ പരമ്പരകളിലും തന്റെ കയ്യൊപ്പ് ചാർത്തി.