பொருத்தமில்லா படிப்பு தவிக்கும் மாணவர்கள்!

உலகம் டிஜிட்டல் மயமாகும் சூழலில் நவீன தொழில் நுட்ப படிப்புகள் வித விதமாக வந்து விட்டன. இந்த நிலையில் எல்லோருக்கும் எல்லாம் விரும்பிய மாதிரி படிக்க வாய்ப்பு கிடைக்கிறதா என்றால் இல்லை என சொல்லலாம்.

- -எஸ்.ரவீந்திரன்

சாதாரணமாக இன்று ஒரு குக்கிராமத்தில் வசிக்கும் ஒரு மாணவர் பிளஸ் 2 முடித்த பின்னர், எந்தக் கல்லூரியில் சேர்வது என்ற தடுமாற்றம் இருக்கும். எந்த படிப்பை தேர்வு செய்வது என்பதிலும் குழப்பம் இருக்கும். கிடைக்கும் மதிப்பெண்களை பொறுத்து பிரிவுகள் கிடைக்கும். அவ்வாறு சேரும் மாணவர்களுக்கு தாங்கள் விரும்பிய இடம், படிப்பு கிடைக்கிறதா என்பது கேள்விக்குறிதான்.

இப்படியான சூழலில் ஒருவர் பெறும் கல்வி தகுதி, திறமை மற்றும் அனுபவம் ஆகியவை தொழில் இலக்குடன் ஒத்துப்போகாத போது, 'பொருத்தமில்லா படிப்பு' என்ற நிலை ஏற்படுகிறது.

அதாவது அவரின் கல்வி தகுதி, விரும்பிய வேலைக்கு தேவையான குறைந்தபட்ச தகுதியுடன் பொருந்தாமல் போகலாம். அந்தப் படிப்பினால் ஒரு குறிப்பிட்ட வேலையில் பங்களிக்க தேவைப்படும் திறமைகள் இல்லாமல் இருக்கலாம்.

உதாரணமாக, ஒருவருக்கு கணினியில் ஆர்வம் இருக்கலாம், ஆனால் அவருக்கு அவர் கற்ற கல்வியின் மூலம், அடிப்படை திறன்கள் பெற முடியாமல் இருக்கலாம்.

சில வேலைகளுக்கு குறிப்பிட்ட அனுபவம் கல்வி தேவைப்படலாம். அந்த அனுபவம் கல்வி மூலம் கிடைக்கவில்லையென்றால், பொருத்தமில்லா படிப்பு என்று கருதப்படும்.

இப்படியாக நாடு முழுவதும் முக்கியமற்ற பாடப்பிரிவுகளை எடுத்துப் பயிலும் மாணவர்கள் எண்ணிக்கை அதிகமாக உள்ளது.