ஜிலேபி...சமோசா...என்னதான் பிரச்சினை?

இந்தியாவில் நாக்பூர் எய்ம்ஸ் உட்பட அனைத்து மத்திய அரசு மருத்துவ மனைகளிலும், உணவுப் பொருட்களில் இருக்கும் எண்ணை மற்றும் சர்க்கரை அளவுகளை பட்டியலிட்டு எச்சரிக்கை பலகைகள் வைக்க வேண்டும் என்று சமீபத்தில் ஒன்றிய சுகாதார அமைச்சகம் உத்தரவிட்டுள்ளது.

- பரிதி

அவ்வாறு பட்டியலிட்டவற்றில், அனைவரும் விரும்பி சாப்பிடும் சமோசா, ஜிலேபி ஆகியவை தீங்கான உணவாக இடம் பெறுகிறது. சமோசா, ஜிலேபி ஆகியவை விரைவில் சுகாதார எச்சரிக்கை பட்டியலில் சேரலாம் என்றும் கருதப்படுகிறது.

நீரிழிவு, இதய நோய் மற்றும் உயர் ரத்த அழுத்தத்துக்கு இந்த இரு சிற்றுண்டிகளும் காரணமாவதாக பெரும்பாலான மருத்துவர்கள் சொல்கின்றனர். ஆனாலும் சிகரெட் வரிசையில் சமோசா, ஜிலேபிக்கும் எச்சரிக்கை வாசகம் வர உள்ளதாக வெளியான தகவலுக்கு ஒன்றிய அரசு மறுப்பு தெரிவித்துள்ளது.

உடல் பருமனை குறைக்கப் போதுமான எண்ணெய், சர்க்கரையின் அளவு தொடர்பாகத்தான் எச்சரிக்கை வாசகம் வெளியிடத் திட்டமிடப்பட்டுள்ளது என்று ஒன்றிய சுகாதாரத்துறை தெரிவித்துள்ளது.

இதற்கு காரணம், இந்தியாவில் உடல் பருமனால் பாதிக்கப் படுபவர்களின் எண்ணிக்கை அதிகரித்து வருகிறது. நகர்ப்புறங்களில் வசிப்பவர்களில் 5-இல் ஒருவர் உடல் பருமனாக இருப்பதாக ஆய்வில் கண்டறியப்பட்டு உள்ளது.

2050-ஆம் ஆண்டுக்குள் 44.9 கோடிக்கும் அதிகமான இந்தியர்கள் அதிக எடை கொண்டவர்களாக இருப்பார்கள் என்று கணிக்கப்பட்டு உள்ளது. உடலுக்கு தீங்கு விளைவிக்கும் மோசமான உணவு வகைகளே பெரும்பாலும் உடல் பருமனுக்கு காரணமாகிறது.

எவ்வாறாயினும், சுகாதார நிபுணர்களின் கூற்றுப்படி, உடல் பருமன் ஒரு அமைதியான தொற்றுநோயாக மாறியுள்ளது.

குறிப்பாக, சமோசா, ஜிலேபியில் அதிகமான மாவுச்சத்து, கொழுப்பு, சர்க்கரை இருக்கின்றன. இவற்றில் மட்டுமல்ல, பிரெட், ஜெல், ஜாம், டோனட், வடாபாவ், பாக்கெட் சிப்ஸ் என பல நொறுக்குத் தீனிகளில் இம்மூன்று கேடுகளும் உள்ளன.

ஃப்ரைட் ரைஸ் உள்ளிட்ட துரித உணவுகள், இனிப்பு மிகுந்த பலகாரங்கள் சாப்பிடுவதாலும் உடல் பருமன் ஏற்படுகிறது. உடல் பருமனால் மூட்டு வலி, இரைப்பை, குடல் பிரச்சினைகளோடு, இதய நோய்களும் வரும் அபாயம் உள்ளது.