என்னை டீல் பண்றது கஷ்டம் இல்லை!

தமிழில் அறிமுகம் என்றாலும் அதன் பின் பாலிவுட்டில் ஒதுங்கி, பாக்ஸ் ஆபீஸ் ஹிட் படங்களை கொடுத்துக் கொண்டிருப்பவர் நடிகை டாப்ஸி பன்னு.

- தவா

தயாரிப்பாளராகவும் அவதாரம் எடுத்திருப்பவர் மனதில் பட்டதை ஒளிவு மறைவின்றி பேசுபவர்.சிறப்பான நடிப்பின் மூலம் ரசிகர் மனங்களை கவர்வதுதான் முக்கியம் என்பவருடன் ஒரு பேட்டி.

உங்களை பிராண்டிங் பண்ணுறதில் விருப்பம் இல்லை என்கிறீர்களே?

நான் ஆல்ரெடி கேமரா முன்னாடி ஒரு வாழ்க்கையை வாழ்ந்துட்டு இருக்கேன். கேமராவுக்கு பின்னாடியும் நடிச்சா அது ரெண்டு வேலை ஆகிடும், அது நல்லதில்ல. எனக்கான ஒரு பிராண்டிங் உருவாக்காம இருக்குறதால நான் ரொம்ப சோம்பேறின்னு நினைப்பாங்க. நான் சினிமா துறையில் நுழையும் போதே என்னோட பாதை தனித்துவமா இருக்கப் போகுதுன்னு முடிவு பண்ணிட்டேன்.

என் வாழ்க்கையில் நடக்குற தவறுகளை மறைக்க நான் முயற்சி செய்ய மாட்டேன். நான் செய்யுற விஷயங்கள் வொர்க் அவுட் ஆகலன்னா, அடுத்து வேற எதாச்சும் பண்ணப் போறேன். தோத்தாலும் நம்பிக்கையோட முழு முயற்சியை கொடுக்கணும்'ன்னு நான் விரும்புறேன். பிராண்டிங் ஆசையில் என்னை தொலைக்க நான் விரும்பல, மன உறுதியோட விரும்பியதை செய்யுறேன்.

வெள்ளித்திரையில் நடித்து சம்பாதித்த பெயர், புகழை எப்படி பார்க்குறீங்க?

புகழ் மேல எனக்கு காதல், வெறுப்பு ரெண்டுமே இருக்கு. நான் என்னுடைய கெரியரை தொடங்கிய புதிதில் ரசிகர்களின் கைதட்டலும், பாராட்டும், புகழும் தான் எனக்கு பெருசா தெரிஞ்சது. கெரியரில் வளர்ந்த பிறகு எனக்கு நடிப்பு ரொம்ப பிடிக்க ஆரம்பிச்சது. நான் நடனத்தில் கைதேர்ந்த பெண். நிறைய ஸ்டேஜ் பெர்பார்மன்ஸ் பண்ணியிருக்கேன். பேச்சாளரா நிறைய மேடைகளில் பேசவும் பிடிக்கும். இதெல்லாம் எனக்கு ரொம்ப சந்தோஷம் கொடுக்கக் கூடியது.

என்னைப் பொறுத்தவரை புகழ்'ங்கிறது ரசிகர்களின் கைதட்டல், ஆரவாரம், விசில் சத்தம், பாராட்டு மட்டும் தான். அதே சமயம், புகழுக்கு இன்னொரு முகமும் இருக்கு.