மோடியை மிரள வைக்கும் மகுவா மொய்த்ரா...யார் ?

ஒன்றிய அரசின் கீழ் இயங்கும் துறைகளில் எதிர்க்கட்சியினரின் வயிற்றில் புளியை கரைக்கும் துறையாக இருப்பது அமலாக்கத்துறை. 'தனிப்பட்ட நபர்களை மிரட்ட சிபிஐ, அரசியல் கட்சியை மிரட்ட அமலாக்கத்துறை' என எதிர்க்கட்சியினர் கூறி வருகின்றனர்.

- நெல்லை பரிதி

மேலும் எதிர்க்கட்சியில் இருப்பவர்களை பா.ஜ.க.விற்கு இழுக்க அமலாக்கத்துறையை துண்டில் புழுவாக அரசு பயன்படுத்துகிறது என்ற குற்றச்சாட்டு தொடர்ந்து வைக்கப்பட்டு வருகிறது.

அதற்கொப்ப, அமலாக்கத்துறையால் விசாரிக்கப்பட்ட பலரும் பாஜகவுக்கு வந்த நிலையில், அவர்கள் மீதான விசாரணை கிடப்பில் போடப்பட்டுவிட்டது.

தற்போது அசாம் முதலமைச்சராக இருக்கும் ஹிமந்தா பிஸ்வா சர்மா, மேற்குவங்க எதிர்க்கட்சித் தலைவர் சுவேந்து அதிகாரி, முகுல் ராய், பஞ்சாப் காங்கிரஸ் முன்னாள் முதல்வர் கேப்டன் அமரீந்தர் சிங் ஆகியோரையும் அமலாக்கத்துறை விசாரணை நடத்தியது. ஆனால், இவர்கள் அனைவரும் பாஜக பக்கம் தாவிவிட்டனர். அதன் பின்னர் அமலாக்கத்துறை அவர்களைக் குறித்து எந்த விசாரணையும் நடத்தவில்லை.

மகாராஷ்டிராவில், மகாராஷ்டிர விகாஸ் அகாடி கூட்டணியிலிருந்து சிவசேனா (ஷிண்டே பிரிவு) பிரிந்து வந்ததற்கு பின்னணியிலும் அமலாக்கத்துறையின் நடவடிக்கைகள் இருப்பதாக குற்றச்சாட்டு உள்ளது.

இந்நிலையில் தான், அமலாக்கத்துறையின் இயக்குநரான சஞ்சய் குமார் மிஸ்ரா பதவியை மூன்றாம் முறையாக நீட்டித்து உத்தரவிட்டு, 3 உச்சநீதிமன்றத்திடம் ஒன்றிய அரசு வாங்கிக்கட்டிக் கொண்டது.