ജുറാസ്സിക് തീരത്തെ പെൺകിടാവ്

അന്തപ്പനന്തിയ്ക്ക് ചന്തയ്ക്കു പോകുമ്പം ഈന്ത് മേന്നൊരോന്തിമാന്തി...

- കെ. സതീഷ് ഫോൺ : 9446756400

പൊതോട്ടുകുന്നി ന്റെ മുകളിലേയ്ക്കുള്ള വഴിയിലൊരരികിൽ ഏകാകിയായി നിൽക്കുന്ന മരം ചൂണ്ടി മഹി പറഞ്ഞു.

“സെർബെറാ ഒദൊളം.

അൻഷി മരത്തെയും മഹിയെയും മാറി മാറി നോക്കി.

“മനസ്സിലായില്ല. ഒദൊളം? ഒതളമരമല്ലേ അത്?

അദന്ന്യാ ഞാനും പറഞ്ഞത്. അതിന്റെ ശാസ്ത്രീയനാമം അങ്ങനെയാ!” 

“അക്കര വടകര വളവിലൊരൊളിവിലൊരാതള മരത്തിൽ പത്തുപതിനഞ്ചിതളൊങ്ങ ...

മഹി ഒറ്റ വീർപ്പിൽ ഉറക്കെച്ചൊല്ലിക്കൊണ്ട് കുന്നിൻ മുകളിലേക്കോടിക്കയറി. അൻഷി പിറകെയും. മഹി ചൊല്ലിയ നാക്കുളുക്കി വാക്യം ഉരുവിടാൻ എത്ര ശ്രമിച്ചിട്ടും കഴിയാതെ അവൾ കുഴങ്ങി.

അവർ പാറപ്പരപ്പിൻ മുകളിലിരുന്ന് കിതപ്പകറ്റി.

പടിഞ്ഞാറൻ കാറ്റ് മന്ദമായി വീശി. ദൂരെ ശാന്തമായ അറബിക്കടൽ കാണാം. അൻഷിക്ക് ഒരു ഇംഗ്ലീഷ് നാക്കുളുക്കി വാക്യം ഓർമവന്നു.

"She sells seashells on the seashore..."

“കൊള്ളാം. നീയത് നന്നായി പറഞ്ഞു. കടപ്പുറത്ത് ഓരോ കൗതുകവസ്തുക്കൾ വിറ്റു നടന്നിരുന്ന നിന്നോളം മാത്രം പ്രായമുള്ള ഒരു പെൺകുട്ടി ശരിക്കുമുണ്ടായിരുന്നു എന്ന് നിനക്കറിയാമോ? മേരി ആനിംഗ് എന്നായിരുന്നു അവളുടെ പേര്.

“എന്തുതരം കൗതുകവസ്തുക്കളാണവൾ വിറ്റു നടന്നത്?

" അൻഷി ജിജ്ഞാസാഭരിതയായി.

പ്രധാനമായും ഫോസിലുകൾ.

“ഫോസിലുകളോ?” വിശ്വാസം വരാതെ അൻഷി പുരികം ചുളിച്ചു.

"അതേ, തെക്കുപടിഞ്ഞാറൻ ഇംഗ്ലണ്ടിൽ ഇംഗ്ലീഷ് ചാനലിനോടു ചേർന്നുള്ള തീരമാണ് ജുറാസ്സിക് കോസ്റ്റ്. അവിടെ തീരത്തോടു ചേർന്ന് ഒരു തൂക്കാം കുന്നുണ്ട്. അതിന് മുകളിലും പരിസരങ്ങളിലും പരതി നടന്ന് അവൾ എണ്ണമറ്റ ഫോസിലുകൾ കണ്ടെടുത്തു. ലക്ഷണക്കിനു വർഷങ്ങൾക്ക് മുമ്പ് ജീവിച്ചിരുന്ന ഇക്തിയോസാർ എന്ന ഉരഗവർഗത്തിൽപ്പെട്ട കടൽജീവിയുടെ അസ്ഥികൂടമാണ് അവൾ ആദ്യം കണ്ടെത്തിയത്. വളരെ സാഹസികമായ ഒരു ജോലിയായിരുന്നു അവളുടേത്.

“എന്തിനാണങ്ങനെയൊരു സാഹസിക ജോലി ബാല്യത്തിൽത്തന്നെ അവൾ തിരഞ്ഞെടുത്തത്?” 

 "ആ പാവപ്പെട്ട കുടുംബത്തിന്റെ ഉപജീവനമാർഗം അതായിരുന്നതുകൊണ്ട്.

മഹി എഴുന്നേറ്റു. ഒപ്പം അൻഷിയും.