நாகர்களுக்குப் பிடித்த நூலும் பாலும்

தென் தமிழகத்திலேயே நாகர் வழிபாட்டுக்கு சிறந்த தலமாக “நாகராஜா கோயில்" திகழ்கிறது.

- டி.எம்.ரத்தினவேல்

தமிழ்நாட்டில், நாகர் வழிபாட்டிற்கு என்று தனியாக அமைந்த கோயில் இதுவேயாகும். திருப்பாம்புரம், பாமணி, நாகப்பட்டினம், திருக்காளஹஸ்தி, திருநாகேஸ்வரம், திருப்பனந்தாள், கீழ்ப்பெரும் பள்ளம், கோடகநல்லூர் போன்ற ஆலயங்களில் எல்லாம் மூலவரான சிவபெருமானை வழிபட்டு, நாகங்கள் தங்களது கொடிய தோஷங்களைப் போக்கிக் கொண்டதால், பெருமைமிக்கதாகும். ஆனால், நாகருக்கென்றே தனிக்கோயில், அதாவது நாகர் மூலவராக வீற்றிருக்கும் ஆலயம் “நாகர்கோவில் நாகராஜா கோயில்" மட்டுமே ஆகும். ஆதிகாலத்தில் இந்த பகுதி வயல்கள் சூழ்ந்ததாக இருந்தது.

வயலில் அரிவாளை வைத்து நெற்கதிர்களை அறுத்துக் கொண்டிருந்த ஒரு பெண், நெற்கதிரை அறுக்கும் போது திடீரென செங்குருதி கொப்பளித்தது.

இதைக் கண்டு பயந்து போன அந்தப் பெண், அருகில் இருந்தவர்களிடம் சொல்ல, அவர்கள் ரத்தம் வந்த இடத்தைப் பார்த்த போது, அங்கே பாறை ஒன்றில் ஐந்து தலையுடன் கூடிய நாகர் உருவம் இருந்தது. அந்த நாகர் சிலையின் மேற்பகுதியில் இருந்துதான் ரத்தம் வந்து கொண்டிருந்தது. பின்பு அந்த நாகர் சிலைக்கு பாலாபிஷேகம் செய்து அந்தப் பகுதி மக்கள் அனைவரும் வழிபட்டனர்.

இதையடுத்து ரத்தம் வருவது நின்றது. எனவே, அந்தப் பகுதி மக்கள் தினமும், அந்த சிலைக்கு பால் அபிஷேகம் செய்து வழிபடத் தொடங்கினர். இதனால் அந்த மக்களின் வாழ்க்கையில் துன்பங்கள் அகன்று, வசந்தம் வீச ஆரம்பித்தது. முதலில் குடிசை போட்டு சிலையை வைத்து ஆராதித்து வந்தனர். ஒருமுறை சரும நோயால் பாதிக்கப்பட்ட களக்காடு பகுதியை ஆண்டு வந்த மன்னன் பார்த்தாண்டவர்மா, நாகராஜா கோயிலுக்கு வந்தார். அவர் நாகராஜருக்கு பால் அபிஷேகம் செய்து வழிபட்டு நோய் நீங்கப் பெற்றார். இதனால் மகிழ்ந்த மன்னன், அவ்விடத்திலேயே நாகராஜவுக்கு ஆலயம் எழுப்பினார். ஆனால், கருவறை மட்டும் நாகங்கள் வசிப்பதற்கு ஏற்ப ஓலைக்கூரையாலேயே வேயப்பட்டது.

ஒவ்வொரு ஆண்டும் ஆடி மாதத்தில் இத்தல அர்ச்சகர்களே ஓலைக் கூரையைப் பிரித்துவிட்டு, புதிய ஓலை கொண்டு கூரையை வேய்கிறார்கள். கேரள கட்டடக்கலை பாணியில் இந்த ஆலயம் அமையப் பெற்றுள்ளது. பல நூறு ஆண்டுகளைக் கடந்த பிறகும் இப்போதும் நாகரின் கருவறை ஓலைக் குடிசையாகவே உள்ளது. களக்காடு மகாராஜா உட்பட எத்தனையோ பணக்காரர்கள் நாகராஜாவுக்கு பிரம்மாண்டமான கருவறையுடன் கூடிய ஆலயம் கட்டித்தர முன் வந்தனர்.