புதைக்கப்படும் சடலங்கள் பல்லாண்டுகளாகியும் அழுகாதிருக்க காரணம் என்ன?

பெரும்பாலும் ஒருவர் இறந்த பின் அவரைப் புதைப்பதற்கு அல்லது இறுதிச் சடங்குகளைச் செய்வதற்குச் சிறிது நேரம் எடுக்கும்.

- 

முன்பெல்லாம் கோடைக் காலத்தில் ஒருவர் இறக்கும்போது, இறந்தவரின் உடல் சாக்குத் துணியில் மூடப்படும். ஆனால் இப்போது குளிரூட்டப்பட்ட வசதி கொண்ட வாகனங்கள் அதற்காகப் பயன்படுத்தப்படுகின்றன.

பதப்படுத்தப்பட வேண்டிய சடலங்கள், குறைவான வெப்ப நிலையில் வைக்கப்படுவதன் மூலம் அவை விரைவில் அழுகாமல் இருக்கின்றன.

அறிவியலின்படி, ஒருவர் இறந்த பிறகு சடலத்தின் மீது பக்டீரியாக்கள் வளருகின்றன. உடல் அழுக முக்கிய காரணம் இதுதான். வழக்கமாக, இறந்து 12 மணிநேரம் கழித்து உடல் அழுக ஆரம்பிக்கிறது.

ஆனால், பல வேளைகளில், உடல்கள் புதைக்கப்பட்டு நீண்ட காலமாகியும் அவை அழுகுவதில்லை எனக் கண்டறியப்பட்டுள்ளது.

பழைமையான கல்லறைகளைத் தோண்டியபோது, பல ஆண்டுகள் கழித்தும் அதிலிருந்த சடலங்கள் கிட்டத்தட்ட அப்படியே இருந்தன. இது பெரும்பாலும் மத ரீதியிலான பார்வையுடன் தொடர்புபடுத்தப்படுகிறது. ஆனால், இதற்குப் பின்னால் அறிவியல் ரீதியிலான காரணங்களும் உள்ளன.

இப்படியான சூழல்களில், உடல்கள் அழுகாமல் இருக்க பல காரணிகள் உள்ளன.

இதற்குத் தடயவியல் விஞ்ஞானிகள் இரு காரணங்களை முன்வைக்கின்றனர். ஒன்று, மம்மிஃபிகேஷன் எனப்படும் உடல் அழுகாமல் பதப்படுத்தும் செயல்முறை (mummification). மற்றொன்று, இறந்த உடல் முழுவதும் மெழுகு போன்ற பொருளால் பூசப்படுவது (adopasory), இது உடல் அழுகாமல் தடுக்கிறது.

இயற்கையாகவே 'மம்மி'யாதல் வறண்ட காற்று மற்றும் ஈரப்பதம் மிகவும் குறைவாக, அதிக வெப்பநிலை உள்ள சூழல்களில் இறந்த உடல்களை வைக்கும்போது, உடலில் நீர் உள்ள பகுதிகள் வேகமாக வறண்டு விடுகின்றன. இதன் காரணமாக, உடலில் பக்டீரியாக்கள் வளர முடியாமல், உடல் எப்படி இருந்ததோ அப்படியே இருக்கும்.

சேர் சலீம் உல்லாஹ் மருத்துவக் கல்லூரி மருத்துவமனையின் தடயவியல் துறைத் தலைவரும் இணைப் பேராசிரியருமான டாக்டர் நஸ்முன் நஹார் ரோஸி, இந்தச் செயல்முறைக்கு மம்மிஃபிகேஷன் என்று பெயர் எனத் தெரிவித்தார்.

இந்தச் செயல்முறை உடலைப் பதப்படுத்துவதற்காகச் செய்யப்படுகிறது. இதன்காரணமாக, பாலைவனங்களில் பல சடலங்கள் இயற்கையாகவே 'மம்மி'யாகி விடுகின்றன. பல ஆண்டுகள் அழுகாமல் அதே நிலையில் இருக்கின்றன.

வறண்ட மணலுள்ள பகுதிகளில் சடலங்கள் இயற்கையாகவே பதப்படுத்தப்படுவது சாத்தியம்.