சர்வதேச நாடுகளும் பாரபட்சம் பார்த்து எம்மை கைவிடும் போக்கு மனவேதனை தருகிறது

மட்டு. மாவட்ட வலிந்து காணாமல் ஆக்கப்பட்ட உறவுகள் சங்கத்தின் தலைவி

- 

வடக்கு, கிழக்கில் நடந்தது ஓர் இன அழிப்பு. எங்களுடைய உறவுகள் காணாமல் ஆக்கப்பட்டிருக்கின்றார்கள். தென்னிலங்கையில் நடைபெற்ற சம்பவங்களையும் வடகிழக்கில் இடம்பெற்ற சம்பவங்களையும் ஐக்கிய நாடுகள் சபை ஒப்பிட்டுப் பார்க்க முடியாது. ஏனென்றால் எமது உறவுகள் வலிந்து காணாமல் ஆக்கப்பட்டிருக்கின்றார்கள் என மட்டக்களப்பு மாவட்ட வலிந்து காணாமல் ஆக்கப்பட்ட உறவுகள் சங்கத்தின் தலைவி திருமதி அ.அமலநாயகி தெரிவித்தார்.

மட்டு ஊடக அமையத்தில் நேற்று மாலை நடைபெற்ற ஊடகவியலாளர் சந்திப்பின்போதே அவர் இதைத் தெரிவித்தார்.

இதன்போது மேலும் கருத்து தெரிவித்த அவர், கடந்த 2015 ஆம் ஆண்டிலிருந்து எமது உறவுகளைத் தேடி உள்ளகப் பொறிமுறையில் நம்பிக்கை இழந்தவர்களாக சர்வதேச நீதிப் பொறிமுறை ஊடாகத்தான் நமக்கான தீர்வு கிட்டும் என்ற நம்பிக்கையில் இத்தனை வருடங்களாக சர்வதேசப் பொறிமுறை ஊடாகத்தான் நீதி வேண்டும் என நாங்கள் கேட்டு நிற்கின்றோம்.

சர்வதேச வலிந்து காணாமல் ஆக்கப்பட்டோர் தினத்திலும் கூட சர்வதேச நீதி கோரித்தான் பாரிய போராட்டம் வடக்கு, கிழக்கில் எம்மால் முன்னெடுக்கப்பட்டது. ஆனால் அது இடம்பெற்று இப்போது 60ஆவது கூட்டத்தொடர் நடந்து கொண்டிருக்கும் இந்த நிலையில் ஐ.நா.வில் காணாமல் ஆக்கப்பட்ட விடயப் பரப்பை உள்ளகப் பொறிமுறை ஊடாக நாங்கள் அவர்களுக்கு தீர்வு கொடுப்போம் என வெளிவிவகார அமைச்சர் முதல் உரையிலே கூறி இருக்கின்றார்.