பவள விழா காணும் பாரதத்தின் கம்பீரம்

உலக வல்லரசான அமெரிக்காவின் வரி மிரட்டலுக்கு அனைத்து நாடுகளும் அஞ்சிநிற்கின்ற போது... அதனை கண்டுகொள்ளாமல் ரஷ்யா, சீனா இந்தியா என வேறு திசையில் அமெரிக்காவுக்கு இணையாக காய் நகர்த்தி அமெரிக்க ஜனாதிபதியையே மிரள வைத்துள்ளார் ஒரு தேநீர் வியாபாரியின் மகன்.

- குமார் சுகுணா

ஏழ்மை நிறைந்த இந்தியாவில் ஏழை தாய்க்கு பிறந்து ஒருகாலத்தில் ரயில் நிலையத்தில் தேநீர் விற்றுக்கொண்டிருந்த சிறுவன் அமெரிக்க ஜனாதிபதிக்கும் ரஷ்ய ஜனாதிபதிக்கும் சீன ஜனாதிபதிக்கும் நிகராய் நின்று ஏழைகள் நிறைந்த நாடு என்ற நிலையை மாற்றி இந்தியாவை வல்லரசு இந்தியாவாக மாற்ற முயற்சிப்பான் என்று யார் நினைத்திருக்கக் கூடும். பல தசாப்தங்களாக தொட முடியாமல் வன்முறைகள் நிறைந்து இருந்த ராம ஜென்ம பூமியான அயோத்தியில் இராமனுக்கு ஆலயம் அமைத்து பட்டாபிஷேகம் நடத்தப்போவது இவர்தான் என யாரும் நினைத்திருக்கமாட்டார்கள். தனது மகள்களின் குங்குமத்தை அழித்தவர்களுக்கு குங்குமம் எனும் பெயராலேயே செந்தூர் என தீவிரவாதிகளுக்கு எல்லைதாண்டி பதிலடி கொடுப்பார் என்றும் இராஜ ராஜ சோழனுக்கும் ராஜேந்திர சோழனுக்கும் விழா எடுத்து சிலை வடிக்கப் போவது இவர் என்றும் யார் அறிந்திருப்பர்.

இந்தியாவில் நீண்ட காலம் பதவியில் இருக்கும் இரண்டாவது பிரதமர் என்ற பெருமையும் இந்தியாவில் மிக நீண்ட காலம் பிரதமர் பதவியில் இருந்த காங்கிரஸ் அல்லாத பிரதமர் என்ற பெருமையும் இந்த தேநீர் விற்கும் சிறுவன் அடைவான் என அந்த சிறுவனே அறிந்திருக்கமாட்டான். ஆனால் ஏழை தாயின் மகன் தனது கடின உழைப்பினால் பாரதத்தின் தன்னிகரில்லா பிரதமராக உருவெடுத்து இந்தியாவை உலகின் உச்சத்திற்கு கொண்டு சென்றுகொண்டிருக்கின்றார். அவர்தான் இன்றைய பாரத பிரதமர் நரேந்திர மோடி.

முன்பெல்லாம் இந்திய பிரதமரா ..? என்று சில பிரதமர்களை இந்தியாவிலேயே சிலர் கேலி செய்த சம்பவங்கள் உள்ளன. ஆனால் மோடி உலகளவில் சக்தி மிக்க தலைவராக பார்க்கப்படுகின்றார். உலகின் மிக சக்தி மிக்க 10 மனிதர்களின் பட்டியலிலும் மோடி இடம் பெற்றுள்ளார்.

இந்தியா இவரது ஆட்சியில் சக்தி மிக்க நாடாக மாறியுள்ளது. ரஷ்யா, அமெரிக்கா, சீனா, பிரான்ஸ் என அனைத்து நாடுகளும் மோடியின் நட்பை பாராட்டுகின்றன.

குஜராத்தில் ஒரு ஏழ்மையான குடும்பத்தில் பிறந்து, பா.ஜ.க.வில் அடிப்படை உறுப்பினராக சேர்ந்து, தற்போது இந்தியாவின் பிரதமராக பதவியில் இருக்கின்றார்.