அரசியல் சர்ச்சையின் இடையில் மலையக மக்களின் உரிமைகள்

மலையகப் பிராந்தியம் (Hill Country / Upcountry) இந்தியாவிலிருந்து பெருந்தோட்ட வேலைகளுக்காக 1823ஆம் ஆண்டில் தமிழ் மக்கள் வரவழைக்கப்பட்டதன் மூலம் உருவானது. இந்த வரலாறு "மலையகம் 200" என்ற நிகழ்வால் அடையாளம் காணப்படுகிறது. பெரும்பாலான இந்த மக்கள் இன்று பெருந்தோட்டங்களில் லயன் குடியிருப்பு (line room) முறையில் வசித்து வருகின்றனர்.

- 

பெரும்பாலும் பெருந்தோட்டங்களில் வாழும் மக்கள், லயன் குடியிருப்பு முறையில் வறுமைக்கோட்டுக்கு கீழ் வாழ்வது மட்டுமன்றி, கல்வி, சுகாதாரம், போக்குவரத்து போன்ற அடிப்படை வசதிகளும் குறைவாகவே காணப்படுகின்றன. இதனால் சமூகப் பொருளாதாரம் பின்தங்கிய நிலை (socioeconomic backwardness) தொடர்கிறது.

மலையகத்தின் இன்றைய நிலை, அவர்களின் வாழ்வாதாரப் பிரச்சினைகள், அவர்கள் எதிர்கொள்ளும் சவால்கள், செல்ல வேண்டிய தூரம் போன்றவற்றைப் பற்றி பல அமைப்புகள் ஆராய்ந்து விவாதித்து வருகின்றன.

இந்தக் குறைபாடுகள் மற்றும் பின்தங்கிய நிலையை தீர்க்க பெருந்தோட்ட பிராந்தியத்துக்கான புதிய கிராமங்கள் அபிவிருத்தி அதிகார சபை சட்டம் - 2018 (New Villages Development Authority Act, No.36 of 2018) ஸ்தாபிக்கப்பட்டது.

அரசாங்க நடவடிக்கைகள்: புதிய கிராமங்கள் அபிவிருத்தி அதிகார சபை (2018)

பெருந்தோட்டங்களில் வாழும் மலையக மக்கள், நீண்டகாலமாக வறுமை, சமூக - அரசியல் பின்தங்கல் மற்றும் அடிப்படை வசதிகள் குறைவு போன்ற சவால்களை எதிர்கொண்டு வருகின்றனர். இந்நிலையில், அவர்கள் இந்த நாட்டின் சம உரிமையுள்ள பிரஜைகள் ஆக மாற்றப்பட வேண்டும் என்பது அரசாங்கத்தின் முக்கிய நோக்கம்.

பழனி திகாம்பரம் அமைச்சராக இருந்த போது, 2018 ஆம் ஆண்டின் இறுதிக் காலப்பகுதியில், மலையக மக்களின் வாழ்க்கைத் தரத்தை உயர்த்தும், அவர்களின் சமூகப் பொருளாதாரப் பின்தங்கிய நிலையின் முன்னேற்றத்தை உறுதி செய்யும் நோக்கத்துடன் புதிய கிராமங்கள் அபிவிருத்தி அதிகார சபை உருவாக்கப்பட்டது.

அந்தரத்தில் உள்ளதா அதிகாரசபை ?

பல ஆட்சிகளின் பிடியிலிருந்து தப்பி சபையின் பணிகளை பெருந்தோட்ட அமைச்சிடம் ஒப்படைத்து, அதிகார சபையை மூடிவிடவேண்டும் என்ற பரிந்துரை அமைச்சரவை மூலம் ஒப்புதல் பெற்றுள்ளது. இதற்கான காரணமாக, அதிகார சபையின் செயற்பாடுகள், திட்ட முன்னேற்றங்கள் மற்றும் நிர்வாக திறன் ஆகியவை ஆய்வு செய்யப்பட்டுள்ளன.

தேசிய மக்கள் சக்தி ஆட்சிக்கு வந்ததும், பிரதமரால் உயர்மட்ட நிர்வாக உத்தியோகத்தர்களைக் கொண்ட குழு டிசம்பர் 2024 இல் நியமிக்கப்பட்டுள்ளது. இந்தக் குழு பெப்ரவரி 2025 அன்று அளித்த அறிக்கையை அடிப்படையாகக்கொண்டு அதிகார சபையை மூடுவதை சிபாரிசு செய்தது.