பொருளாதாரத்தை பாதுகாக்க வரிச்சலுகை அவசியமென்பதை ஏற்றுக்கொண்ட ஜனாதிபதி

அரசாங்கத்தின் தேசிய கொள்கைக் கட்டமைப்பானது, 'வளரும் தேசம் அழகான வாழ்க்கை' என்ற தொனிப்பொருளின் கீழ் வலுவான உற்பத்திப் பொருளாதாரத்தை முன்னெடுத்து நிலையான பொருளாதார வளர்ச்சி மற்றும் மேம்பாட்டை அடைவதற்கு முன்னுரிமை அளிப்பதை நோக்கமாகக் கொண்டுள்ளது.

- நிவேதா அரிச்சந்திரன்

அதனடிப்படையில் இலங்கை அரசாங்கம் பொருளாதார நெருக்கடியிலிருந்து மீண்டுவர சில இறுக்கமான கட்டுப்பாடுகளைக் கடைப்பிடித்தமையின் விளைவாக தற்போது பொருளாதார முன்னேற்றத்தை நோக்கி வேகமாக முன்னேறிவரும் அபிவிருத்தியடைந்து வரும் நாடுகள் என்ற பட்டியலுக்குள் இலங்கை இடம்பிடித்துக் கொண்டுள்ளது.

கடந்த காலங்களில் இலங்கையில் ஏற்பட்ட கொவிட் - 19 தொற்று மற்றும் அதனோடிணைந்த பொருளாதார நெருக்கடி உள்ளிட்ட காரணங்களால் இலங்கை இனியும் இல்லையென்றளவு பொருளாதார ரீதியில் பாரிய பின்னடைவைச் சந்தித்தது. அபிவிருத்தியடைந்து வரும் நாடென்ற நிலையிலிருந்த இலங்கை மீண்டும் வங்குரோத்து நிலைக்குச் செல்ல வேண்டியேற்பட்டது. இந்நிலையில் உலக வங்கி, சர்வதேச நாணய நிதியம் மற்றும் இந்தியா, சீனா, ஜப்பான் போன்ற உலக நாடுகளின் தயவால் ஓரளவு பெருமூச்சுவிடக்கூடிய வாய்ப்பு இலங்கைக்குக் கிட்டியது. இதையடுத்து இலங்கை மீண்டும் அபிவிருத்தியடைந்து வரும் நாடென்ற பட்டியலுக்குள் பிரவேசித்து பொருளாதார மீட்சிக்கான காய்நகர்த்தல்களை மேற்கொண்டு வருகிறது.

இலங்கையில் புதிய ஆட்சி மாற்றம் ஏற்பட்டு தேசிய மக்கள் சக்தி தலைமையிலான அரசாங்கம் நாட்டைத் தற்போது பொறுப்பேற்ற கையோடு பொருளாதார முன்னேற்றம் தொடர்பான காய்நகர்த்தல்களை மேற்கொண்டு வருகின்றது. அதன் முக்கிய இலக்காக இலங்கையின் சுற்றுலாத்துறை அபிவிருத்தி காணப்படுகிறது. மறுபக்கம் புலம்பெயர் மக்களின் முதலீடுகள், வெளிநாட்டு நாணயப் புலக்கத்தை அதிகரித்தல், ஏற்றுமதிச் சந்தையை விஸ்திரப்படுத்தல் போன்ற முக்கிய விடயங்களில் அரசாங்கம் கவனம் செலுத்தி வருகிறது.

அந்த வகையில் விவசாயத்துறையை மேம்படுத்தும் திட்டங்களுக்கு இந்தியா, கொரியா போன்ற நாடுகள் தற்போது நிதி அனுசரணை வழங்கியுள்ளன. அடுத்தக்கட்டமாக ஆடைத்துறையை மேலும் வலுப்படுத்துவதற்கு அரசாங்கம் நடவடிக்கைகளை எடுத்து வருவதை அவதானிக்க முடிகிறது. அதேபோன்று பிரித்தானியாவால் ஆடைகளுக்கான வணிக விதிகளைத் தளர்த்துவதற்குத் தீர்மானிக்கப்பட்டுள்ளதாக அறிவிக்கப்பட்டுள்ளது. இது இலங்கைக்குக் கிடைத்த மற்றுமொரு சாதகமான வாய்ப்பாகவே பார்க்க வேண்டியுள்ளது.

கடந்த வாரம் ஜனாதிபதி தலைமையில் நடைபெற்ற ஆடைத் துறையினருடனான வரவு செலவுத் திட்டப் பூர்வாங்கக் கலந்துரையாடலில் ஜனாதிபதி அநுர அரசாங்கத்தின் ஆடைத்துறை தொடர்பான நிலைப்பாட்டையும் வெளிப்படுத்தியிருந்தார்.