சவால்களும் வாய்ப்புகளும்

2022ஆம் ஆண்டு மிகப் பெரிய பொருளாதார நெருக்கடியின் அலைகளால் தவித்த இலங்கை, கடந்த சில ஆண்டுகளாக ஒரு கடினமான நிதி மறுசீரமைப்பை மேற்கொண்டு, பொருளாதார நிலைத்தன்மையை அடைவதில் குறிப்பிடத்தக்க முன்னேற்றம் கண்டு வருகிறது.

- ரொபட் அன்டனி

இதனை உலகளாவிய நிதி நிறுவனங்கள் அங்கீகரித்து வருகின்றன. இந்நிலையில் இலங்கையின் பொருளாதார மீட்சியை, உலக வங்கி அதன் அண்மைய அறிக்கையில் விரிவாக ஆராய்ந்து பரிந்துரைகளை முன் வைத்திருக்கிறது.

இந்த நடவடிக்கைகளின் பின்னணியில், பொறுப்புள்ள நாணயக்கொள்கை (Monetary Policy) மற்றும் பயன்பாட்டுச் செலவினங்களை (utility pricing) சந்தை விலைக்கு ஏற்ப மாற்றியமைத்தலும் முக்கியமான காரணிகளாக அமைந்தன. அண்மைக் காலமாக இலங்கையின் பொருளாதாரம், பல முக்கிய பொருளாதார குறிகாட்டிகளில் ஸ்திரத்தன்மையைக் காட்டியுள்ளது. எனினும், இந்த விரைவான சீர்திருத்தத்தின் பின்னால், சில சமூக மற்றும் பொருளாதார விடயங்களும் உள்ளன. குறிப்பாக, வருமான வரிக்கு பதிலாக, மறைமுக வரிகளை (indirect taxes) அதிகம் நம்பியிருந்ததால், கீழ் மட்ட வருமானம் கொண்ட குடும்பங்கள் பெரும் சுமையைச் சந்தித்தன. அத்தியாவசியப் பொருட்களின் விலைகள் அதிகரித்ததால், அவர்களின் கொள்வனவு சக்தி குறைவடைந்தது. வாழ்க்கைச் செலவு அதிகரித்தது. வறுமை தலைவிதித் தொடத் தொடங்கியது என்று உலக வங்கி அறிக்கை வெளியிட்டுள்ளது. ஏற்கனவே உலக வங்கி 2024 ஆம் ஆண்டு வெளியிட்ட அறிக்கையில் இலங்கையில் வறுமை 25.9 சதவீதமாக அதிகரித்துள்ளதாக புள்ளிவிபரங்களை வெளியிட்டிருந்தது.

இந்நிலையில் உலக வங்கியின் புதிய அறிக்கை இலங்கையின் சவால்களை வெளிப்படையாக ஏற்றுக்கொண்டு, எதிர்காலத்தில் இந்த அணுகுமுறையை மறுபரிசீலனை (recalibration) செய்ய வேண்டியதன் அவசியத்தை வலியுறுத்துகிறது.

உலக வங்கியின் புதிய அறிக்கையின் படி, நடுத்தர மற்றும் நீண்ட காலத்துக்கு நிலைத்தன்மையை உறுதிப்படுத்த, இலங்கை ஒரு சமநிலையான நிதி உபாயத்தை (balanced fiscal strategy) வகுக்க வேண்டும் என்று பரிந்துரைக்கப்படுகிறது.