ரணில் விக்கிரமசிங்கவை இலக்குவைக்க தேசிய மக்கள் சக்தி அரசாங்கம் சட்டத்தை ஆயுதமாகப் பயன்படுத்துகிறதா?

சட்டத்தை ஆயுதமாகப் பயன்படுத்துகிறதா?

- 

ஐக்கிய தேசிய கட்சியின் தலைவர் ரணில் விக்கிரமசிங்க ஐந்து தசாப்தங்களுக்கும் அதிகமான காலமாக அரசியலில் இருக்கிறார். பாராளுமன்ற உறுப்பினராக, பிரதிநிதி அமைச்சராக, அமைச்சரவை அந்தஸ்துள்ள அமைச்சராக, எதிர்க்கட்சி தலைவராக, பிரதமராக, ஜனாதிபதியாக பதவிகளை வகித்த விக்கிரமசிங்க அரசியலில் பயனிழந்துபோன ஒரு சக்தி என்று அடிக்கடி வர்ணிக்கப்பட்டு வந்திருக்கிறார். உறுதிவாய்ந்த ரணில் அரசியல் களத்தில் வலிமையுடன் திரும்பவும் குதித்து எப்போதுமே தனது எதிரிகளை தவறு என்று நிரூபித்து வந்திருக்கிறார். அண்மைய நிகழ்வுகள் மன எழுச்சி மிக்க ரணில் தன்னை எளிதில் தள்ளுபடி செய்துவிடக்கூடிய ஒரு ஆள் அல்ல என்று மீண்டும் நிரூபிக்கக்கூடும் என்பதற்கான அறிகுறியாக தோன்றுகின்றன.

ரணில் விக்கிரமசிங்க 2025 ஆகஸ்ட் 22ஆம் திகதி குற்றப்புலனாய்வு பொலிஸாரினால் (சி.ஐ.டி.) கைது செய்யப்பட்டு பொதுச் சொத்துக்கள் சட்டத்தின் 5 (1) பிரிவு மற்றும் தண்டனைச் சட்டக்கோவையின் 386 & 388 பிரிவுகளின் கீழ் நீதிமன்றத்தில் குற்றஞ்சாட்டப்பட்டார். அவர் ஆகஸ்ட் 26ஆம் திகதிவரை நான்கு நாட்களுக்கு கொழும்பு கோட்டை நீதவான் நீதிமன்ற நீதிபதி நிலுப்புலி லங்காபுரவினால் விளக்கமறியலில் வைக்கப்பட்டார். அதன் மூலமாக விக்கிரமசிங்க இலங்கையின் வரலாற்றில் கைது செய்யப்பட்டு விளக்கமறியலில் வைக்கப்பட்ட முதலாவது முன்னாள் ஜனாதிபதியாகவும் முன்னாள் பிரதமராகவும் விளங்குகிறார்.

கைவிலங்கிடப்பட்ட நிலையில் அவர் சிறைச்சாலை வாகனத்தில் மகசீன் சிறைச்சாலைக்கு கூட்டிச்செல்லப்பட்டார். அங்கு சென்ற பிறகு முன்னாள் ஜனாதிபதியின் உடல் நிலை கடுமையாகப் பாதிக்கப்பட்டது. முதலில் வெலிக்கடை சிறைச்சாலை வைத்தியசாலையில் அனுமதிக்கப்பட்ட அவர் பிறகு அங்கிருந்து கொழும்பு தேசிய வைத்தியசாலைக்கு மாற்றப்பட்டு தீவிர சிகிச்சைப் பிரிவில் அனுமதிக்கப்பட்டார்.

விக்கிரமசிங்கவுக்கு இரத்தக்குழாய்களில் மூன்று அடைப்புகள் ஏற்பட்டிருப்பதாகவும் இதயத்தசைகள் அழுகல், நீரிழிவு மற்றும் சுவாசப்பைத் தொற்று நோய் ஆகியவற்றினால் பாதிக்கப்பட்டிருப்பதாகவும் கண்டறியப்பட்டது. இந்த நோய்களின் விளைவான பாதிப்புகள் வெளித்தோற்றத்தில் தெரியவராது. கடந்த ஏழு வருடங்களாக இருதயநோயினால் விக்கிரமசிங்க பாதிக்கப்பட்டிருக்கிறார்.