கெண்டைக்கால் தசை என்னும் இரண்டாம் இதயம்!

நம்மில் பலர் நீண்ட நேரம் நிற்கும் அல்லது உட்காரும் பணியில் இருப்போம்.

- 

அப்படி இருப்பவர்களுக்கு எளிதில் இவ்வாறு நரம்புகள் சுற்றிக்கொள்ளும். இதனால் பிற்காலத்தில் கால் முட்டி வலி, கால் குடைதல் போன்ற பல பிரச்சினைகள் ஏற்படலாம். இதிலிருந்து தற்காத்துக்கொள்ள நமது காலில் கெண்டைக்கால் சதை என்று சொல்லப்படும் தசையினைப் பற்றி ஒவ்வொருவரும் தெரிந்துகொள்ள வேண்டியது அவசியமாகிறது. அதிலும் குறிப்பாக இதன் முக்கியத்துவம் யாது? இதற்கும் நரம்பு சுற்றுவதற்கும் என்ன சம்பந்தம் உள்ளது போன்ற பலவற்றையும் இங்கே தெரிந்து கொள்வோம்.

கெண்டைக்கால் தசைகள்...

நம் உடலின் மொத்த எடையும் நமது கணுக்கால் மூட்டுகளில்தான் கடைசியாக இறங்கும். இந்த மூட்டுக்கு உறுதுணையாக பெரிதும் இயங்கும் கெண்டைக்கால் தசைகள் என்பது மூன்று வெவ்வேறு தசைகளை உள்ளடக்கியவை. இவை மூன்றும் சேர்ந்து நம் பின் குதிகால் பகுதியில் சென்று முடியும். தசைகள் எலும்பில் சென்று முடியும்போது தசை நாராக மாறி இருக்கும். அப்படி இந்த இடத்தில் அடர்த்தியான பட்டையான தசைநார் சென்று முடியும். இதனை அக்கிலீஸ் டென்டன் (Achilles Tendon) என மருத்துவத்தில் அழைப்போம். இதுவே நம் உடலின் மிக உறுதியான தசை நார். நம் கால் விரல்களை ஊன்றி நிற்க இந்த தசைகள் உதவும். மேலும் நடப்பதற்கும், ஓடுவதற்கும், குதிப்பதற்கும் இந்த தசைகள்தான் உதவியாய் இருக்கும். இத்தசைகள் புவியீர்ப்பு சக்திக்கு எதிராக செயல்பட்டு நாம் நிற்பதற்கு உதவியாக இருக்கும்.

இரண்டாம் இதயம்...

உடலில் பல முக்கியமான இடங்களில் தசைகள் இருந்தும் ஏன் இந்தக் கெண்டைக்கால் தசைகள் மட்டும் கூடுதல் முக்கியமானது என்றால், இது, நம்மைக் காக்கும் இரண்டாம் இதயம் என்றே சொல்லலாம். ஏனெனில், நம் கால்கள் முழுவதிலும் இருக்கும் காபனீரொக்சைடு (Carbondioxide ) வாயு நிறைந்த ரத்தத்தினை மேலே இதயத்துக்கு எடுத்துச்செல்ல உறுதுணையாக இருக்கிறது. ஒவ்வொரு முறையும் நாம் கணுக்காலினை அசைக்கும் பொழுது இந்த தசைகள் வேலை செய்து அதாவது, சுருங்கி விரிந்து ரத்தத்தினை புவியீர்ப்பு விசைக்கு எதிராக மேலே இதயத்துக்கு செலுத்துகிறது. மேலும் இந்த இடத்தில் தசை நாரை வெட்டிவிட்டால் ஒருவரால் எப்பொழுதும் நடக்க முடியாமல் போகும். மேலும் ரத்த இழப்பு அதிகம் ஏற்பட்டு மரணிக்கவும் நேரிடும். அதனால்தான் திரைப்படங்களில்கூட கணுக்காலில் சுடுகின்றனர்.