ஜனாதிபதி திசாநாயக்கவின் கச்சத்தீவு விஜயம் புதுடில்லிக்கும் தமிழ் நாட்டுக்கும் அனுப்பிய சந்தடியற்ற செய்தி

சீனாவின் ரியான்ஜின் நகரில் ஜனாதிபதிகள் ஜின்பிங்குடனும் விளாடிமிர் புட்டினுடனும் கமராக்களுக்கு முன்னால் நின்று பிரதமர் நரேந்திர மோடி தோழமை உறவுகளை வெளிக்காட்டியதை பார்த்து இந்தியா வடக்கு நோக்கி கவனத்தைச் செலுத்திக்கொண்டிருந்த அதேவேளை, இந்தியாவின் தென்திசை அயல்நாடு புதுடில்லிக்கும் தமிழ்நாட்டுக்கும் சந்தடியில்லாமல் ஒரு செய்தியை அனுப்பியது.

- நிருபமா சுப்பிரமணியன்

வடமாகாணத்தின் யாழ்ப்பாணத்துக்கு இந்த வருடத்தில் நான்காவது விஜயத்தை மேற்கொண்ட இலங்கை ஜனாதிபதி அநுர குமார திசா நாயக்க எந்த அறிவிப்பும் செய்யாமல் கடற்படையின் அதிவேக படகில் கச்சதீவுக்கு சென்றார். தரிசு நிலமான அந்த தீவில் காலடி வைத்த முதல் இலங்கை ஜனாதிபதி என்ற பெருமைக்கு அவர் உரியவராகியிருக்கிறார்.

அவ்வாறு செய்ததன் மூலமாக ஜனாதிபதி திசாநாயக்க கச்சதீவை இலங்கையின் பிராந்தியம் என்பதை அடையாளப்படுத்தியிருக்கிறார். கச்சதீவு இலங்கையின் ஒரு பகுதி. பாக்கு நீரிணையில் உள்ள அந்த தீவு தனக்கே சொந்தம் என்று உரிமை கோரிய இலங்கைக்கு இந்தியா 1974 ஆம் ஆண்டில் கைச்சாத்திடப்பட்ட உடன் படிக்கையில் விட்டுக்கொடுத்தது. " இரு நாடுகளுக்கும் இடையிலான வரலாற்று ரீதியான கடல் எல்லை மற்றும் அதனுடன் தொடர்புடைய விவகாரங்கள் தொடர்பிலான உடன்படிக்கை என்று அது அழைக்கப்படுகிறது. (அந்த உடன்படிக்கை பிறகு 1976ஆம் ஆண்டில் இரு நாடுகளுக்கும் இடையிலான கடல் எல்லையை வகுப்பதற்கான இன்னொரு உடன்படிக்கைக்கு வழிவகுத்தது)

அவ்வாறிருந்தாலும் இராமேஸ்வரத்துக்கும் யாழ்ப்பாணத்துக்கும் இடையில் இருக்கும் கச்சதீவு இந்தியாவுக்கும் இலங்கைக்கும் இடையிலான உறவுகளில் திரும்பத் திரும்ப ஒரு உரசலுக்கான விடயமாகவும் விளங்குகிறது. காலனித்துவ யுகத்திலோ அல்லது சுதந்திரத்துக்கு பின்னரான காலப்பகுதியிலோ இந்தியாவின் எந்தவொரு வரைபடத்திலும் எல்லை வரையறை செய்யப்படவில்லை என்ற போதிலும், தமிழ் நாட்டு அரசியல்வாதிகள் இராமேஸ்வரம் மீனவர்களின் உணர்வுகளை சாந்தப்படுத்துவதற்காக, மக்கள் வாழாத கச்சதீவை " மீட்பது " குறித்து அடிக்கடி பேசுகிறார்கள். பாக்கு நீரிணையின் இருமருங்கிலும் உள்ள மீனவர்களுக்கு இடையில் ( கிடைப்பதற்கு அரிதாக இருக்கும்) வளங்கள் தொடர்பிலான முரண்நிலையே இந்த பிரச்சினையின் மையமாக விளங்குகிறது.