இந்தோனேசிய படகுச் சவாரியில் தனது நடனத்தால் மேலதிகமாக ஒரு இலட்சம் பார்வையாளர்களை ஈர்த்த சிறுவன்

இந்தோனேசியாவில் நடைபெறும் வருடாந்த படகோட்டப் போட்டி சுற்றுலாப் பயணிகளை ஈர்ப்பதில் பிரசித்தி பெற்றது. இம்முறை வழக்கத்தைவிட ஒரு இலட்சம் பார்வையாளர்கள் அதிகமாக இப்போட்டிகளைப் பார்வையிட்டுள்ளனர். இதற்குக் காரணம், படகு ஒன்றில் நடனமாடும் 11 வயது சிறுவன்.

- ஆர்.சேதுராமன்

சுமத்ரா தீவிலுள்ள ரியாவ் மாகாணத்தின் குவான்டன் நதியில் பகு ஜலூர் ((Pacu Jalur) எனும் இப்படகுச் சவாரி நடைபெறுகிறது.

நீண்ட படகுகளில் வண்ணமயமான துடுப்புகளை ஏந்திய படகோட்டிகள், வேகமாக துடுப்பு வலித்துச் செல்வதைக் காண்பதற்கு நதியோரத்தில் பெரும் எண்ணிக்கையான பார்வையாளர்கள் திரண்டிருப்பர்.

இவ்வருட 'பகு ஜலூர்' படகோட்டப் பந்தயம் கடந்த மாதம் நடைபெற்றது.

இப் பாரம்பரிய படகுகளின் முன்புறத்தில் நடனமாடுவதற்கு சிறுவர்களை நியமிக்கின்றனர். இத்தகைய நடனத்தில் பிரபலமான ஒரு சிறுவன் இவ்வருட பகு ஜலூர் போட்டிகளுக்கு மேலும் சுவாரஸ்யத்தை ஏற்படுத்தியுள்ளான்.

11 வயது ரய்யான் அர்கான் டிகா எனும் இச் சிறுவன் வேகமாக செல்லும் படகின் முன்புறத்தில் நின்றவாறு நடன அசைவுகள் மூலம் பார்வையாளர்களை ஈர்க்கிறான்.

இந்த சிறுவன் காரணமாக இந்த ஆண்டு சுமார் ஒரு இலட்சம் பார்வையாளர்கள் கூடுதலாக வந்திருப்பதாக அந்நாட்டு அதிகாரிகள் மதிப்பிட்டுள்ளனர்.

சிறுவன் ரய்யான், விரைந்து செல்லும் பந்தயப் படகில் நடனமாடும் 20 வினாடி காணொளியொன்று ஏற்கெனவே சமூக ஊடகங்களில் மில்லியன் கணக்கான பார்வைகளைப் பெற்றுள்ளது.