உடல் குறித்த விமர்சனம் நடிகைகள் பதில்

‘காய்த்த மரமே கல்லடி படும்’ என்ற பழமொழி எல்லோருக்கும் பொருந்தும் என்றாலும் சினிமா நட்சத்திரங்களுக்கு அதிகமாகவே பொருந்தும். தினம் தினம் அவர்களைச்சுற்றி ஏதேனும் ஒரு செய்தி இறக்கை கட்டி பறந்துகொண்டிருக்கும்.

- 

எதற்காக இந்த முன்னோட்டம்..?

பொலிவுட் சினிமாவில் பிரபலமானவர் வித்யா பாலன். இவர் தமிழில் ‘உருமி’, ‘நேர்கொண்ட பார்வை’ உட்பட சில படங்களில் நடித்துள்ளார்.

சமீபத்தில் இவர் ஒரு பேட்டியில், “உடல் எடையைக் குறித்து பலமுறை அசௌகரியங்களை சந்தித்துள்ளேன். ஒரு படத்துக்காக என்னை அணுகியபோது ‘உங்களுடன் நடிக்கும் ஹீரோ இளைஞன். நீங்கள் எடையைக் குறைக்க வேண்டும்’ என்று கேட்டார்கள். இதுபோன்ற பிரச்சினைகள் பல ஆண்டுகளாக என்னைப் பின் தொடர்கின்றன.

ஆம். பல ஆண்டுகளாக. ஒவ்வொரு படத்துக்காக என்னை ஒப்பந்தம் செய்ய வரும்போதும், ‘உங்களால் கொஞ்சம் எடையைக் குறைக்க முடியுமா’ என்று கேட்கிறார்கள்; கேட்டுள்ளார்கள்.

அதற்காகவே பைத்தியம் பிடித்தது போல் பயிற்சி செய்து கொண்டிருந்தேன், விருப்பு உணவுவகைகளைத் தவிர்த்தேன். சினிமாவுக்காக தீவிர உடற்பயிற்சி, டயட் என இருந்ததால் பல மாதங்கள் உடல் வலி, வீக்கம் இருந்தன. ஒரு கட்டத்தில் அது ஹார்மோன் பிரச்சினையாக மாறியது.

அந்த நொடியில் முடிவெடுத்தேன். என்னை நடிக்க வைக்க விரும்பினால்... கதைக்கு நான் தான் தேவை என முடிவு செய்தால்... என்னுடைய தோற்றம் எப்படி இருக்கிறதோ அப்படியே ஏற்க வேண்டும். கதாபாத்திரத்துக்கு ஏற்ப உடலில் மாற்றம் வேண்டும் என்றால் வேறு ஆளைப் பார்த்துக் கொள்ளுங்கள் என்று கறாராக சொல்லத் தொடங்கிவிட்டேன்...” என்று ‘உடல் நேர்மறை’ குறித்து பேசியுள்ளார்.

இவருடைய கருத்து சினிமாவுலகில் பரபரப்பை ஏற்படுத்தியுள்ள நிலையில் ‘உடல் நேர்மறை’ என்றால் என்னவென்று பார்ப்போம்.

‘உடல் நேர்மறை’ (Body Positivity) என்பது, ஒவ்வொருவரும் தங்கள் உடல், உருவம் எப்படி இருக்கிறதோ அதை அப்படியே ஏற்றுக் கொண்டு நேசிப்பது, மதிப்பது. இதுவே மானுடத்தின் அடிப்படை நோக்கம்.

இது ஒரு நேர்மறை மனநிலை என்பது மட்டுமல்ல, சமூகக் கட்டமைப்பின் முக்கிய அம்சமுமாகும்.