சர்ச்சைக்குரிய தீர்மானங்களை எடுக்க தயங்கவே மாட்டேன்

வடக்கு தொடர்பாக தேவையற்ற அச்சத்தை ஏற்படுத்தும் அரசியல் தென் பகுதியில் நடக்கின்றது; புதுக்குடியிருப்பில் ஜனாதிபதி அறிவிப்பு

- இராஜதுரை ஹஷான்

தேசிய நல்லிணக்கத்தை உறுதிப்படுத்துவதற்கு சர்ச்சைக்குரிய வகையில் தீர்மானங்களை எடுப்பதற்கும் பின்வாங்கப் போவதில்லை. பழைய இனவாத கோஷங்களுக்கு எதிரான செயற்பாடுகளை மீளப்பெறப் போவதில்லை.

தமது உறவுகளுக்கு என்ன நேர்ந்தது என்பதை அறிந்து கொள்ளும் உரிமை அனைவருக்கும் உண்டு. காணி உரிமை மற்றும் தமது இடங்களில் வாழும் உரிமை அனைவருக்கும் உண்டு. முற்போக்கான தீர்மானங்களை எடுக்கும் போது இனவாதிகள் கோஷமிடுவார்கள். அந்தக் கோஷங்கள் வெற்றிபெற இடமளிக்கப் போவதில்லை. வடக்கை அச்சுறுத்தலான நிலையில் வைத்திருக்கவே தெற்கில் ஒரு தரப்பினர் முயற்சிக்கின்றனர் என்று ஜனாதிபதி அநுரகுமார திசாநாயக்க தெரிவித்தார்.

வடமாகாணம் தொடர்பாக தேவையில்லாத அச்சத்தை ஏற்படுத்தும் அரசியல் ஒன்று தென்பகுதியில் நடக்கின்றது என்றும் ஜனாதிபதி குறிப்பிட்டார்.

உலக தெங்கு தின நிகழ்வுகளுடன் இணைந்த வகையில் 'நாடே சுபீட்சம் ஆக்கும் விருட்சம் - கற்பகத்தரு வளம்' என்ற வடக்கு தெங்கு முக்கோண தொடக்க விழா நேற்று (02) ஜனாதிபதியின் தலைமையில் புதுக்குடியிருப்பு நகரில் நடைபெற்றது. இந்நிகழ்வில் உரையாற்றுகையிலேயே ஜனாதிபதி மேற்கண்டவாறு குறிப்பிட்டார்.

ஜனாதிபதி அங்கு மேலும் உரையாற்றுகையில், புதுக்குடியிருப்பு பிரதேசமானது பின்தங்கிய நிலையிலும், கடந்த கால மோதல்களினால் இந்த பிரதேச மக்கள் பலவற்றை இழந்துள்ளார்கள். பிள்ளைகள், உறவுகள் உட்பட தமது உடமைகளை இழந்தவர்கள் இந்த பிரதேசத்தில் வாழ்கிறார்கள்.

சமீபத்திய தேர்தல்களின் போது நான் வடக்கு மாகாணத்துக்கு வந்து உரையாற்றியிருந்தேன். மோதல் உட்பட பல பிரச்சினைகளால் பாதிக்கப்பட்ட இந்த மக்களுக்கு மீண்டும் சிறந்த வாழ்க்கையை வழங்கும் பொறுப்பு எமக்குண்டு.