வழமையான நீதியா அல்லது நிலைமாறுகால நீதியா?

காஸாவில் இஸ்ரேலின் நடவடிக்கைகள் தொடர்பாக சர்வதேச சமூகம் ஒப்பீட்டளவில் மௌனம் சாதித்து வருகிறது. ஏனைய சர்வதேச நெருக்கடிகளை கையாளும்போது கடுமையான அணுகுமுறையை கடைப்பிடிப்பதை தவிர்த்து, சர்வதேச சமூகம் மனித உரிமைகள் விவகாரத்தில் இலங்கை மீது நெருக்குதல்களை பிரயோகிப்பதால் அசௌகரியமான ஒரு நிலை காணப்படுகிறது. இத்தகைய ஒரு சூழ்நிலை இந்த தடவை மனித உரிமைகள் பேரவையில் இலங்கை தொடர்பில் கொண்டு வரப்படக்கூடிய தீர்மானம் கடுமைகுறைந்ததாக இருக்கும் என்பதற்கு நம்பகமான காரணமாக இருக்கலாம்.

- கலாநிதி ஜெகான் பெரேரா

ஒழுங்கான முறையில் பிரயோகிக்கப்படாத மனித உரிமைகள் நிகழ்ச்சி நிரலுக்கு ஒத்துழைத்து இலங்கைக்கு எதிராக கடுமையான ஒரு தீர்மானத்துக்கு வாக்களிப்பதில் மேற்குலகைச் சாராத நாடுகளுக்கு பெரிதாக அக்கறை இல்லை.

மறுபுறத்தில், உள்நாட்டு விசாரணைகளின் பக்கச்சார்பின்மை மீது நம்பிக்கை இல்லை என்று கூறி தமிழ் அரசியல் கட்சிகளும் உள்நாட்டு மற்றும் சர்வதேச மனித உரிமைகள் செயற்பாட்டாளர்களும் சுயாதீனமான சர்வதேச விசாரணை வேண்டும் என்ற கோரிக்கையை முன்வைப்பதை காணக்கூடியதாக இருக்கிறது.

அதேவேளை, ஏற்கனவே அறியப்பட்ட மனிதப்புதைகுழி பகுதிகளிலிருந்து தோண்டியெடுக்கப்படும் எலும்புக்கூடுகள் தேசிய நல்லிணக்கம் மீதான அரசாங்கத்தின் பற்றுறுதிக்கு ஒரு பரீட்சையாக அமைந்திருக்கின்றன. செம்மணியில் புதைகுழிகளை தோண்டும் நடவடிக்கைகள் தொடரும் நிலையில், சிறுவர்களின் எலும்புக்கூடுகள் உட்பட மேலதிக மனித எச்சங்கள் மீட்கப்படுகின்றன. செம்மணியில் மனித புதைகுழிகள் இருப்பது 1998ஆம் ஆண்டிலிருந்தே தெரிந்த விடயமாகும். பாடசாலை மாணவியொருவரை பாலியல் வல்லுறவுக்கு உட்படுத்தி கொலை செய்ததுடன் அவரைத் தேடிச்சென்ற உறவினர்களையும் கொலை செய்ததாக படையினருக்கு எதிராக தொடுக்கப்பட்ட வழக்கில் குற்றவாளியாகக் காணப்பட்ட இராணுவ அதிகாரிகள் அளித்த ஒப்புதல் வாக்கு மூலத்தில் செம்மணியில் பெரும் எண்ணிக்கையானோர் கொலை செய்யப்பட்டு புதைக்கப்பட்டதாக கூறியிருந்தனர். உண்மைக்கு முகம்கொடுப்பதை தவிர்ப்பதற்காக அரசாங்கங்கள் அந்த புதைகுழிகள் தொடர்பிலான விசாரணைகளை தடுத்தன அல்லது தாமதப்படுத்தின. இது தொடர்பான அக்கறைகளை கடந்தவாரம் ஜனாதிபதி தனது பாராளுமன்ற உரையில் வெளிப்படுத்தினார்.

செம்மணி விசாரணையில் அரசாங்கம் தலையீட்டைச் செய்யப்போவதில்லை என்று மீண்டும் உறுதியளித்த ஜனாதிபதி, பொலிஸும் சட்டமா அதிபர் திணைக்களமும் நீதித்துறையும் சுயாதீனமாகவும் வெளிப்படைத்தன்மையுடனும் நடவடிக்கைகளை தொடர்ந்து முன்னெடுக்கும் என்று கூறினார்.