கிர் காட்டிற்கு உள்ளே மற்றும் வெளியே வாழும் சிங்கங்களின் வாழ்க்கை எவ்வாறு வேறுபடுகிறது?

புல்வெளிகள், புதர்க்காடுகள் அல்லது அடர்ந்த காடுகளில் வாழும் மாமிச உண்ணிகளாக சிங்கங்கள் கருதப்படுகின்றன. உலகளவில் சிங்கங்கள் இயற்கையாக வாழும் இடங்கள் இரண்டு மட்டுமே. ஒன்று ஆப்பிரிக்கா கண்டத்தில் உள்ள காடுகள், மற்றொன்று இந்தியாவின் கிர் காடு. கிர் காடுகளில் வாழும் சிங்கங்கள் ‘ஆசிய சிங்கங்கள்' என்று அழைக்கப்படுகின்றன.

- 

இந்த காடு ஜூனாகத், கிர்சோம்நாத் மற்றும் அம்ரேலி மாவட்டங்களில் பரவியுள்ளது. வன விலங்குகளுக்காக இந்த காடு மூன்று முக்கிய பகுதிகளாகப் பிரிக்கப்பட்டுள்ளது. கிர் தேசிய பூங்கா, கிர் வனவிலங்கு சரணாலயம் மற்றும் பனியா வன விலங்கு சரணாலயம் ஆகியவை தான் அந்த மூன்று பகுதிகள்.

இவை தவிர, அம்ரேலியில் உள்ள மிதியாலா வனவிலங்கு சரணாலயம் மற்றும் ஜூனாகத்தில் உள்ள கிர்னார் வனவிலங்கு சரணாலயம் ஆகியவை ஆசிய சிங்கங்களின் முக்கிய வாழ்விடங்களாக உள்ளன. கடந்த இரண்டு ஆண்டுகளாக, போர்பந்தரில் உள்ள பர்தா வனவிலங்கு சரணாலயத்தையும் சிங்கங்கள் தங்களுடைய வாழ்விடமாக மாற்றியுள்ளன. கடந்த 20-25 ஆண்டுகளில், அவற்றின் எண்ணிக்கை அதிகரிப்பதன் காரணமாக, ஆசிய சிங்கங்கள் இந்த பாதுகாக்கப்பட்ட பகுதிகளுக்கு வெளியே வரத் தொடங்கியுள்ளன. கிர் காட்டைச் சுற்றியுள்ள சிறிய பாதுகாக்கப்பட்ட காடுகள், ஒதுக்கப்பட்ட காடுகள் மற்றும் வகைப்படுத்தப்படாத காடுகளிலும், ஜூனாகத், கிர் சோம்நாத், அம்ரேலி, பாவ்நகர், ராஜ்கோட் மற்றும் போர்பந்தர் மாவட்டங்களில் உள்ள ஆறுகள் மற்றும் ஓடைகளின் பள்ளத்தாக்குகளிலும், அணைகளைச் சுற்றியுள்ள புதர்கள் நிறைந்த பகுதிகளிலும், சாகுபடி செய்யப்படாத தனியாருக்குச் சொந்தமான தரிசு நிலங்களிலும், அரசாங்க தரிசு நிலங்கள், மேய்ச்சல் நிலங்கள், பயிரிடப்பட்ட வயல்கள் மற்றும் தோட்டங்களைச் சுற்றியுள்ள புதர்களிலும் சிங்கங்கள் இப்போது குடியேறியுள்ளன.

இந்தப் பகுதிகள் 'கிரேட்டர் கிர்' என்று அழைக்கப்படுகின்றன. போர்பந்தரில் தொடங்கி பாவ்நகரின் தலாஜா தாலுகா வரை கடற்கரையோரத்தில் உள்ள காண்டா அகாசியா மரங்களின் அடர்ந்த காடுகளிலும் சில சிங்கங்கள் குடியேறியுள்ளன. ஆனால், கிர் காட்டிற்கு வெளியே வாழும் சிங்கங்களின் வாழ்க்கையும் காட்டுக்குள் வாழும் சிங்கங்களின் வாழ்க்கையும் ஒன்றாக உள்ளாதா என்ற கேள்விக்கான பதிலைத் தெரிந்து கொள்வோம்.

பாதி சிங்கங்கள் கிர் காட்டிற்கு வெளியே வாழ்கின்றனவா?

குஜராத் வனத்துறையால் 2025ம் ஆண்டு மே மாதம் நடத்தப்பட்ட கணக்கெடுப்பின்படி, குஜராத்தில் இப்போது 891 ஆசிய சிங்கங்கள் உள்ளன. 2020 ஆம் ஆண்டில், இந்த எண்ணிக்கை 674 ஆக இருந்தது. அதாவது, ஐந்து ஆண்டுகளில் அந்த எண்ணிக்கை 32 சதவீதம் அதிகரித்துள்ளது.