முதலீட்டு சபை வழங்கிய தகவலையே ஹரிணி கூறினார்

சுப்ரீம் செட் செய்மதி நாட்டுக்கு இலாப மீட்டித் தரக் கூடியதாக அமைந்திருந்தால் 13 ஆண்டுகள் ராஜபக் ஷர்கள் அமைதியாக இருந்திருக்க மாட்டார்கள். முதலீட்டு சபை வழங்கிய தகவல்களையே பிரதமர் ஹரிணி அமரசூரிய பாராளுமன்றத்தில் முன்வைத்தார். எனவே இதனை அடிப்படையாகக் கொண்டு அவரை பதவி நீக்க வேண்டிய அவசியம் இல்லை என்று அமைச்சரவை பேச்சாளர் அமைச்சர் நளிந்த ஜயதிஸ்ஸ தெரிவித்தார்.

- எம்.மனோசித்ரா

கொழும்பிலுள்ள அரசாங்க தகவல் திணைக்களத்தில் நேற்று செவ்வாய்க்கிழமை இடம்பெற்ற வாராந்த அமைச்சரவை தீர்மானங்களை அறிவிக்கும் ஊடகவியலாளர் மாநாட்டிலேயே அவர் இதனைத் தெரிவித்தார்.

அமைச்சர் மேலும் குறிப்பிடுகையில், உலகில் தகவல் தொலைத்தொடர்பாடல் தொழில்நுட்பத்துக்காக சர்வதேச தொலைத் தொடர்பாடல் சங்கம் ஐக்கிய நாடுகளின் விசேட பிரதிநிதித்துவ அலுவலகமாக செயற்படுகின்றது. இதன் ஊடாகவே சுப்ரீம் செட் தொடர்பான தொழில்நுட்ப மற்றும் ஒருங்கிணைப்பு செயற்பாடுகள் முன்னெடுக்கப்படுகின்றன. சர்வதேச தொலைத்தொடர்பாடல் சங்கமானது செய்மதியொன்றை அனுப்பும் செயற்பாட்டை மூன்று பிரதான வழிமுறைகளின் கீழ் செயற்படுத்துகின்றது.

உலகளாவிய ரீதியில் அந்த வழிமுறைகள் ஏற்றுக்கொள்ளப்பட்டுள்ளன. இந்த நடைமுறைகளுக்கு ஆகக்குறைந்தது 3 ஆண்டுகளும் ஆகக்கூடியது 7 ஆண்டுகளும் எடுக்கும். சர்வதேச தொலைத்தொடர்பாடல் சங்கத்தில் இலங்கை தொலைத்தொடர்பாடல் ஒழுங்குபடுத்தல் ஆணைக்குழு அங்கத்துவம் வகிக்கிறது. அதற்கமைய இலங்கைக்கு 125.5 மற்றும் 50 ஆகிய இரு புவிச்சரிதவியல் தளங்கள் கிடைக்கப்பெற்றுள்ளன.

சர்வதேச தொலைத்தொடர்பாடல் சங்கம் வழங்கியுள்ள தகவலுக்கமைய இவ்விரு தளங்கள் இலங்கைக்கு ஒதுக்கப்பட்டுள்ள அதேவேளை, ஆப்கானிஸ்தான், கிர்கிஸ்தான், மோல்டோவா, நேபாளம், ருமேனியா போன்ற நாடுகளுக்கும் தேவையேற்படின் தடையின்றி இந்த தளங்களில் அவர்களது செயற்பாடுகளை முன்னெடுப்பதற்கும் அனுமதி வழங்கப்பட்டுள்ளதாகத் தெரிவிக்கப்பட்டுள்ளது.