நீதிக்கான போராட்டத்தை சர்வதேசம் நோக்கி நகர்த்தியுள்ளோம்

இலங்கையில் தமிழர்கள் இன அழிப்பு செய்யப்பட்டுள்ளனர். ஐ.நா. கூட்டத்தொடரின் போது இதற்கான குரல் ஒலிக்க வேண்டும். எதிர்வரும் 30ஆம் திகதி நடாத்தப்படும் போராட்டத்துக்கு அனைத்து தரப்பினரையும் ஆதரவு வழங்குமாறு கிழக்கு மாகாணத்திலுள்ள வலிந்து காணாமல் ஆக்கப்பட்ட உறவுகளின் சங்கங்கள் வேண்டுகோள் விடுத்துள்ளன.

- பட்டிருப்பு நிருபர்

இந்தப் பிரச்சினை பாதிக்கப்பட்ட மக்களுக்கான பிரச்சினைகள் மட்டுமல்ல முழு தமிழ் இனத்துக்குமான பிரச்சினையாகும். எனவே இந்தப் போராட்டத்துக்கு அனைவரையும் ஒன்றிணையுமாறு வட, கிழக்கு மாகாண வலிந்து காணாமல் ஆக்கப்பட்ட உறவுகள் சங்கத்தின் உபதலைவியும் மட்டக்களப்பு மாவட்ட வலிந்து காணாமல் ஆக்கப்பட்ட உறவுகள் சங்கத் தலைவியுமான அ. அமலநாயகி தெரிவித்தார்.

கிழக்கு மாகாணத்தின் மட்டக்களப்பு, அம்பாறை, திருகோணமலை மாவட்ட வலிந்து காணாமல் ஆக்கப்பட்ட உறவுகள் சங்கங்களின் தலைவிகள் பங்குகொண்ட ஊடக சந்திப்பு நேற்று(7) மட்டு. ஊடக அமையத்தில் நடைபெற்றது.

இதன்போது சங்கத்தின் தலைவி கருத்து தெரிவிக்கையில், பல ஆண்டுகாலமாக எமது உறவுகளுக்கு நீதி கோரி போராடியபோதிலும், 17 வருடங்களாக இலங்கை அரசாங்கம் நீதியை வழங்க மறுத்ததன் காரணமாக சர்வதேச நீதிப்பொறிமுறையின் ஊடாகவே எங்களுக்கு நீதி கிடைக்கும் என்ற நம்பிக்கையில் சர்வதேசத்தை நோக்கி எங்களது போராட்டத்தை முன்னெடுத்து வருகின்றோம்.