உச்சத்தை தொட்ட இதழியல் பயணத்தின் வெற்றிகரமான ஒரு வீச்சு

படைப்பாளிகளோடும் பத்திரிகை வாசகர்களோடும் கரங்களைப் பற்றிய வண்ணம் 95 ஆண்டுகள் பயணிக்கும் இலங்கை ‘வீரகேசரி'

- ஆர். என். லோகேந்திரலிங்கம் கனடா உதயன் வார இதழ் பிரதம ஆசிரியர்

ஊடகத்துறையில் அச்சுப் பதிப்பாக வெளிவரும் பத்திரிகைகள் மற்றும் சஞ்சிகைகளின் ஒவ்வொரு வெளியீட்டையும் இதழ்கள் என்று நாம் உச்சரிக்கும் போது எமக்கு மலர் ஒன்று தான் ஞாபகத்துக்கு வரும்.

பூக்களைப் பார்க்கும் போதும் அல்லது அவற்றை கைகளில் ஏந்தியவண்ணம் இருக்கின்ற நேரத்திலும் பக்தி கலந்த உணர்வு எம் உடலின் நரம்புகளின் ஊடாக பரவுவதை நாம் அனுபவிக்க முடிகிறது.

இதைப்போலவே ஒரு பத்திரிகைப் பிரதியையோ அன்றி சஞ்சிகையின் பிரதியொன்றையோ கைகளில் எடுத்து ஒவ்வொரு பக்கமாக புரட்டுகின்ற போது நாம் பலவற்றைச் சிந்திக்கின்றோம். அந்தப் பொழுதில் ஏதோ ஒரு வகையான பரவசத்தின் எல்லையை நாம் எட்டுவதற்கு காரணம் அதில் நாம் வாசிக்கப்போகின்ற அல்லது வாசித்த செய்திகளோ, அன்றி இலக்கியப் படைப்புக்களோ, அன்றி நகைச்சுவைத் துணுக்குகளோ எவையாயினும், எம் வாசிப்பு ரசனைக்கு ஏற்ப அவை எம்மை திருப்தியடையச் செய்யும் வல்லமை மிக்கவை என்பதை மறுப்போர் எவரையுமே நாம் காண முடியாது.

இவ்வாறாக மலர்களின் இதழ்களுடன் ஒப்பிட்டு அச்சு இதழ்களை நாம் பார்த்தாலும் ஒரு பத்திரிகையை அச்சிட்டு வெளியிடுவது என்பது எவ்வளவு சவால்களும் சிரமங்களும் நிறைந்த ஒரு பணியென்பதை அந்தத் துறையில் ஈடுபட்டவர்கள் மாத்திரமே அறிவார்கள். சுமார் ஐந்து இலட்சம் தமிழர்கள் வாழும் கனேடிய தேசத்தில் 29 ஆண்டுகளாக ஒரு வாரப் பத்திரிகையை வெளியிட்டு அதன் ஆசிரியராகப் பணியாற்றி பெற்ற அனுபவ உணர்வோடு 'வீரகேசரி' பத்திரிகையின் தனித்துவம் கண்டு நான் வியந்து நிற்கின்றேன். பல்வேறு துறையினரையும் தன்னுடன் இணைத்து அவர்களது முன்னேற்றத்தை கருத்தில் கொண்டு தானும் உயர்ந்து நிற்கின்ற காலப்பகுதியில் தன் தலையை உயர்த்தியவண்ணம் நிமிர்ந்து நிற்கும் ஒரு வெற்றியாளனைப் பார்ப்பது போல 'வீரகேசரி' பத்திரிகையை வெளியிடும் எக்ஸ்பிரஸ் நியூஸ்பேப்பர்ஸ் நிறுவனத்தையும் அதற்கு அடித்தளமிட்ட பெருந்தகைகளை பெருமிதத்தோடு நினைத்துப் பார்க்கின்றேன். அதற்கு மேலாக உச்சத்தை தொட்ட தனது இதழியல் பயணத்தின் வெற்றிகரமான வீச்சை எட்டியவண்ணம், அந்தப் பயணத்தின் ஒரு நூற்றாண்டின் நிறைவை அடைவதற்கு இன்னும் எஞ்சியிருப்பவை சில ஆண்டுகளே என்பதை அறிகின்றபோது, அந்த சாதனையும் உலகத் தமிழர்களால் கொண்டாடப்பட வேண்டிய நாளுக்காக அனைவரும் காத்திருப்பதும் எமக்குரிய பாரிய கடமை என்று உணர்ந்தவனாக பாராட்ட விரும்புகின்றேன்.