இலங்கையிலே நிலத்துக்கு கீழே தான் உண்மைகள் பலவும் புதைக்கப்பட்டுள்ளன

சர்வதேச பொறிமுறை அவசியம் என்கிறார் ஜனாதிபதி சட்டக்காணி சுமந்திரன்

- ஐ. சிவசாந்தன்

இலங்கையிலே நிலத்துக்கு கீழே தான் உண்மைகள் பலவும் புதைக்கப்பட்டிருக்கின்றன. முழுமையான வெளிப்படைத்தன்மையோடு முழுமையான சர்வதேச மேற்பார்வையோடு இவை வெளிக்கொண்டு வரப்பட வேண்டும் என்பதை அரசுக்கு கூறுகிறோம். ஒரு சர்வதேச பொறிமுறை இதற்குள் கொண்டு வரப்பட வேண்டும் என்பதை நாங்கள் வலியுறுத்துகிறோம் என ஜனாதிபதி சட்டத்தரணி எம்.ஏ.சுமந்திரன் தெரிவித்தார்.

யாழ்ப்பாணம் செம்மணி மனிதப் புதைகுழியில் அகழ்வு இடம்பெறுவதை நேற்று முன்தினம் திங்கட்கிழமை நேரில் சென்று பார்வையிட்ட பின்னர் ஊடகங்களுக்கு கருத்து வெளியிடும் போதே இவ்வாறு அவர் குறிப்பிட்டார்.

அவர் அங்கு மேலும் தெரிவிக்கையில்,

செம்மணி மனிதப் புதைகுழி ஆய்வு நடைபெறுகிற இடத்திலே ஸ்கேனர் கருவி இன்றைக்கு பாவிக்கப்பட்டிருக்கிறது. அதனை பாவிப்பதன் மூலமாக நிலத்துக்கு அடியிலே ஏதாவது அசாதாரணமான விடயங்கள் காணப்பட்டால் அல்லது அசைவுகள் இருந்தால் இந்த இயந்திரம் அதனை வெளிக்கொண்டு வரும் எனச் சொல்கிறார்கள்.