பாலியல் வன்கொடுமை வழக்கு: தேவகவடா போனுக்கு சாகும் வரை சிறை

பாலியல் வழக்கில் மதசார்பற்ற ஜனதா தள கட்சியின் முன்னாள் எம்.பி.யும், தேவகவுடாவின் பேரனுமான பிரஜ்வல் ரேவண்ணாவை குற்றவாளி என தீர்ப்பளித்த பெங்களூரு மக்கள் பிரதிநிதிகள் சிறப்பு நீதிமன்றம், அவருக்கு சாகும் வரை ஆயுள் தண்டனை விதித்து உத்தரவிட்டது.

- 

கர்நாடக மாநிலம் ஹாசன் தொகுதி மஜத முன்னாள் எம்.பியும், முன்னாள் பிரதமர் தேவகவுடா பேரனுமான பிரஜ்வல் ரேவண்ணா மீது மைசூரு கே.ஆர். நகரைச் சேர்ந்த பெண் ஒருவர், பிரஜ்வல் தன்னை பாலியல் வன்கொடுமை செய்ததாக புகார் அளித்தார்.

அந்த புகாரின் அடிப்படையில் பிரஜ்வல் ரேவண்ணா மீது வழக்குப்பதிவு செய்யப்பட்டது. அவர் மேலும் பல பெண்களை பலாத்காரம் செய்து அதை கைப்பேசியில் காணொளியாக எடுத்து வைத்ததாக குற்றச்சாட்டு எழுந்தது. இந்த சம்பவம் வெளிச்சத்துக்கு வரவே, பிரஜ்வல் ரேவண்ணா வெளிநாட்டிற்கு தப்பிச் சென்றார். பின்னர் அவர் நாடு திரும்பியதும், இந்த வழக்கை விசாரிக்க அமைக்கப்பட்டிருந்த எஸ்.ஐ.டி அதிகாரிகள் அவரை கடந்த ஆண்டு மே மாதம் பெங்களூரு கெம்பேகவுடா விமான நிலையத்தில் கைது செய்தனர்.

அவரது கைபேசியையும் பறிமுதல் செய்தனர். அதில் 2,900 ஆபாச காணொளி பறிமுதல் செய்யப்பட்டது.

எஸ்.ஐ.டி அதிகாரிகளால் கைது செய்யப்பட்ட பிரஜ்வல் ரேவண்ணா, கடந்த 14 மாதங்களாக பெங்களூரு பரப்பன அக்ரஹாரா சிறையில் அடைக்கப்பட்டுள்ளார். இந்த வழக்கை விசாரித்துவரும் மக்கள் பிரதிநிதிகள் சிறப்பு நீதிமன்றத்தில், கடந்த ஆண்டின் இறுதியில் குற்றப்பத்திரிகை தாக்கல் செய்தது.

123 ஆதாரங்களைச் சேகரித்து சுமார் 2000 பக்கங்கள் கொண்ட குற்றப்பத்திரிகையை எஸ்.ஐ.டி குழு நீதிமன்றத்தில் தாக்கல் செய்தது. இந்த வழக்கில் பிரஜ்வல் ரேவண்ணா குற்றவாளி என சிறப்பு நீதிமன்ற நீதிபதி சந்தோஷ் கஜனனபட் தீர்ப்பளித்தார். தண்டனை விவரத்தை நேற்றுமுன்தினம் 2ஆம் திகதி அறிவித்தார்.