நல்லூரில் வீற்றிருந்து நல்லாட்சி புரியும் நல்லக்கந்தன்

முருகப் பெருமான் ஈழமணித்திருநாட்டின் பல்வேறு இடங்களில் கோயில் கொண்டெழுந்தருளி அருள்மழை பொழிந்து வருகின்றார். முருகப்பெருமான் ஆலயங்களுள் முதன்மைப் பெற்றுத் திகழும் நல்லைக் கந்தன் ஆலயம் அமைந்திருக்கும் நல்லையம்பதி, வரலாற்றுச் சிறப்பும், ஆன்மிகச் சிறப்பும் உடையது.

-  நயினை நா.க. குமாரசூரியர்

‘நல்லையம்பதி’ என்னும் அழகிய திருப்பதியிலே அருட்கோல நாயகனாக வீற்றிருந்து அகிலமெல்லாம் அருள் சுரந்து கொண்டிருப்பவர் நல்லைக் கந்தன். அலங்காரக் கந்தன் என அனைவராலும் அழைக்கப்படும் அழகுக்கோலம் நல்லைக்கந்தனின் சிறப்பாகும். முத்தமிழால் வையகத்தாரையும் வாழ வைக்கும் முருகப் பெருமான், அருட்சக்திகளான தெய்வானையம்மையும், வள்ளியம்மையும் அருகே வீற்றிருக்க, ஷண்முகப் பெருமானாக வீற்றிருந்து அருளாட்சி புரிகின்றார். அழகுக் கந்தன் அலங்காரக் கந்தனாக வீற்றிருக்கும் அற்புதத் திருத்தலம் நல்லூர்.

முருகன் என்றால் அழகு என்று பொருளாகும். முருகப் பெருமான் என்றும் அழகுடன் திகழ்வதால் 'கந்தன்' என்றும் இளமையுடன் திகழ்வதால் 'குமரன்' என்றும் அழைக்கப்படுகின்றான். அழகன் முருகன் நல்லையம்பதியில் வீற்றிருந்து எல்லோரையும் வாழ வைக்கிறான். உலகமெல்லாம் பரந்து வாழும் சைவ நன்மக்கள் எல்லோரும் கரங்குவித்து, வரம்வேண்டி நிற்கும் அற்புதமான தெய்வம் நல்லூர்க் கந்தப் பெருமானாராவார்.

சங்கபோதி புவனேகபாகுவால் கட்டப்பட்ட நல்லூர்க் கந்தசாமி கோயில் யாழ்ப்பாணத்தில் ஓர் அருள்மிக்க, அற்புத ஆலயமாகக் காட்சி அளிக்கின்றது. கருணைக்கடலாக வீற்றிருந்து அருள் மழை பொழியும் நல்லூர்க் கந்தனை வழிபடும் அடியார்களுடைய துன்ப, துயரங்கள் இன்னல்கள் எல்லாம் சூரியனைக் கண்ட பனி போல விலகுகின்றது என்பது அடியார்களுடைய நம்பிக்கையாகும். உதயசூரியனின் வெண்பொற் கதிர்கள் முருகப்பெருமானின் அழகிய கோபுரங்கள் மீது படர்ந்து 'பளிச்' என ஒளி வீச, மணிக் கோபுரத்தின் மணியோசை ஆலயத்தின் நாலா பக்கத்திலும் ஒலிக்க அடியார்களை தன்வசப்படுத்தி அருளாட்சி செய்கிறார் கந்தப்பெருமான்.