ஏழு சிகரங்கள் சவாலை வெற்றிகரமாக நிறைவேற்றிய முதலாவது இலங்கை மலையேறி ஜொஹான் பீரிஸ்

உலகின் ஏழு கண்டங்களில் உள்ள மிக உயரமான மலைகளை ஏறி 'ஏழு சிகரங்கள் சவாலை' பத்துவருடங்களில் வெற்றிகரமாக நிறைவேற்றிய முதலாவது இலங்கையர் என்ற வரலாற்றுச் சாதனையை இலங்கையின் முன்னணி மலையேறி ஜொஹான் பீரிஸ் படைத்துள்ளார்.

- நெவில் அன்தனி

கடந்த ஒரு தசாப்தத்தில் வேறு எந்த இலங்கையராலும் நெருங்க முடியாமல் போன 7 உயரமான சிகரங்களில் இலங்கையின் தேசிய கொடியை நாட்டிய பெருமை ஜொஹான் பீரிஸை சாருகிறது.

உலகில் உள்ள மிக உயரமான மலைகளை ஏறி இலங்கையின் இரண்டு கோடி மக்களுக்கு புகழையும் பெயரையும் ஈட்டிக்கொடுக்க வேண்டும் என்பதில் உறுதியாக இருந்த ஜொஹான் பீரிஸ், அந்த முயற்சியை நிறைவேற்றி வெற்றி வீரனாக அண்மையில் நாடு திரும்பினார்.

முயற்சி பாதி, திருவினை பாதி என்று சான்றோர்கள் கூறியிருந்தது எவ்வளவு உண்மை என்பது ஜொஹான் பீரிஸ் விடயத்தில் நிரூபணமானது. 'உலகில் உள்ள மிகவும் உயரமான மலைகளின் உச்சியை அடைய வேண்டும் என்பதில் நான் கொண்டிருந்த வைராக்கியம், என்னிடம் இருந்த விடாமுயற்சி, அர்ப்பணிப்புத்தன்மை என்பவை ஒரு புறமிருக்க, எல்லாம் வல்ல இறைவனின் வல்லமைதான் இந்த சாதனையை நிலைநாட்ட எனக்கு உறுதுணையாக இருந்தது.

வெப்பமண்டல நாடுகள், கடல் மட்டத்திலிருந்து மிக உயரமான இடங்கள், பனிச் சூறாவளி, பனிக்கட்டி மழை என பல்வேறு சவால்களுக்கு மத்தியில் இந்த ஏழு சிகரங்களில் எனது கால்களைப் பதித்த இந்த சவால்மிக்க முயற்சியில் நான் வெற்றிபெறுவதற்கு என்னை வழிநடத்திய இறைவனுக்கே எல்லாப் புகழும் உரித்தாகும்' என நாடு திரும்பிய ஜொஹான் பீரிஸ் தெரிவித்தார். 'இது எனது பயணம் மட்டுமல்ல. ஒவ்வொரு சிகரத்திலும் இலங்கையர் ஒருவரால் நிற்க முடியும் என்ற துணிச்சலுடன் கூடிய நம்பிக்கையைக் கொண்டிருக்கும் சகல இலங்கையருக்கும் சொந்தமானது' என்றார் ஜொஹான் பீரிஸ்.

அவரது மலை ஏறும் பயணம் முதன்முதலில் 2014இல் ஆரம்பமானது. அதனைத் தொடர்ந்து ஏழு சிகரங்களின் உச்சியை அடைவதற்கு அவருக்கு சரியாக 10 வருடங்கள் தேவைப்பட்டது. அவரது முதலாவது முயற்சி ஆபிரிக்க கண்டத்தில் ஆரம்பமானது. தென் ஆபிரிக்காவில் உள்ள 19,341 அடி உயரமான கிளிமஞ்சாரோ (Kilimanjaro) மலை உச்சியை 2014இல் ஏறி சாதித்த ஜோஹான் பீரிஸ், 2016இல் உலகிலேயே மிக உயரமான எவரெஸ்ட் (Everest) சிகரத்தை அடைய முயற்சித்தார். ஆனால், எவரெஸ்ட் சிகரத்தை அடைவதற்கு மேலும் 400 மீற்றர் மீதம் இருந்தபோது தொழில்நுட்ப காரணத்தால் அவருக்கு திரும்ப வேண்டிய நிர்ப்பந்தம் ஏற்பட்டது.