42 ஆண்டுகளாகியும் ஆறாத வடுவாக 83 ஆடிக்கலவரம்

இலங்கை ஒரு இனக்கலவரம் கொண்ட நாடு என்பதையும் இங்குள்ள தமிழர்கள் காரண காரியமின்றி காலத்துக்குக் காலம் கொல்லப்படுகிறார்கள் என்பதையும் உலகுக்கு பச்சையாக வெளிப்படுத்திக் காட்டிய இனக்கலவரம் 1983 ஆம் ஆண்டு ஆடிமாதம் இடம்பெற்ற கலவரமாகும். இக்கலவரம் நடந்து 42 வருடங்கள் கழிந்தோடிவிட்டபோதும், இதற்கான பரிகாரங்கள் தேடப்படவுமில்லை. அடையாளங்கள் நீக்கப்படவுமில்லை. இந்த அரக்கத்தன மான விளைவுகளின் தொடர்ச்சியே இன்று செம்மணியிலும் முள்ளிவாய்க்காலிலும் கண்டுகொள்ளக் கூடியதாயிருக்கிறது.

- 

இலங்கையில் தமிழர்களுக்கெதிரான இனக்கலவரங்கள் முதன்முதல் கட்டவிழ்த்துவிடப்பட்டது 1956 ஆம் ஆண்டில்தான். கிழக்கில் (கல்லோயா) 150 தமிழர்கள் படுகொலை செய்யப்பட்டார்கள். இதுவே தமிழர்களுக்கு எதிராக முதன்முதல் ஆரம்பித்து வைக்கப்பட்ட இனக்கலவரமாகும். இலங்கை சுதந்திரம் பெறுவதற்கு முன்பே தமிழர்களையும், சிங்களவர்களையும் மோதவிடும் தந்திரோபாயத்தைப் பிரித்தானியர் மிக திட்டமிட்ட முறையில் மேற்கொண்டார்கள் என்பதற்கு 1883 இடம் பெற்ற கொட்டாஞ்சேனைக் கலவரம், 1939 ஆம் ஆண்டு இடம் பெற்ற நாவலப்பிட்டி கலவரம், 1958 ஆம் ஆண்டு உண்டாக்கப்பட்ட அரசியல் கலவரம் என்பவை இலங்கை அரசாங்கங்களுடைய அதிகாரத்தைத் தாண்டி அயல்நாடுகளோ அந்நிய நாடுகளோ தெரிந்து கொள்ள முடியாத கலவரங்களாக இருந்தன. இக்காரணத்தினால் ஈழத்தீவில் வாழும் சிறுபான்மை மக்கள் அதிகாரம் படைத்த ஆட்சி வர்க்கத்தால் அழிக்கப்படுகிறார்கள் என்ற செய்தி வெளியாகி சொல்ல முடியாத அடைக்கப்பட்ட தகவல்களாகவே இருந்தன. ஆனால் 1983 ஆம் ஆண்டுக் கலவரமென்பது இந்த நிலைமைகளை உடைத்தெறிந்து இலங்கைவாழ் தமிழர்களுக்கு அரசியல் பொருளாதார மற்றும் சமூக ரீதியாக இழைக்கப்படும் கொடுமைகளைப் புடம் போட்டுக் காட்டிய கலவரமாக மாறியது. இலங்கைத்தீவில் ஈழத்தமிழர்கள் என்ற சிறுபான்மை சமூகம் தமது தேசிய உரிமைகளுக்காகப் போராடிக் கொண்டிருக்கிறார்கள் என்ற உண்மை தெரியவந்தது.

இக்கலவரம் தோன்றியதற்கான காரணங்கள், அது ஏற்படுத்திய அழிவுகள், அட்டூழியங்கள் மற்றும் விளைவுகளைத் தெரிந்து கொள்வது இந்தக் கலவரத்தின் உக்கிரத்தைத் தெரிந்து கொள்ள உதவலாம். கறைபடிந்த கறுப்பு ஜூலையென கொடூர வரிகளாலும் செம்மைக் குருதியாலும் வர்ணிக்கப்பட்ட இந்தக் கலவரம் தோன்றியதற்கான காரணங்கள் இவ்வாறுதான் ஏற்பட்டது என்பதை பத்தரிகைகளும் ஏடுகளும் விவரித்துக் காட்டியுள்ளன.