அதிர்ச்சியை ஏற்படுத்தி வரும் செம்மணி புதைகுழி விவகாரம்

யாழ்ப்பாணம் செம்மணி மனித புதைகுழி விவகாரமானது தமிழ் மக்கள் மத்தியில் பெரும் அதிர்ச்சியை ஏற்படுத்தியிருக்கின்றது.

- 

அத்துடன் உள்நாட்டிலும் சர்வதேச தரப்பிலும் இந்த விவகாரம் தற்போது பேசுபொருளாக மாறியிருக்கின்றது.

செம்மணியில் தற்போது இடம்பெற்ற முதலாம்கட்ட அகழ்வுப் பணியில் 64 மனித எலும்புக் கூடுகள் முழுமையாக மீட்கப்பட்டிருக்கின்றன. இந்த எலும்புக் கூடுகளில் சிறுவர்கள், பெண்கள் என பலதரப்பட்டவர்களும் அடங்குகின்றனர்.

சிறுவயதையொத்த சில எலும்புக் கூடுகளும் மீட்கப்பட்டிருந்தன. அந்த எலும்புக்கூடு ஒன்றுடன் நீல நிற புத்தகப் பை ஒன்றும் மீட்கப்பட்டிருந்தது. அதனைவிட விளையாட்டு பொம்மை ஒன்றும் கைப்பற்றப்பட்டிருந்தது. புத்தகப் பையும் விளையாட்டு பொம்மையும் கைப்பற்றப்பட்டமையானது வயது வேறுபாடின்றி படுகொலை செய்யப்பட்டு இப்பகுதியில் மக்கள் புதைக்கப்பட்டமையை அம்பலப்படுத்தியிருக்கின்றது.

செம்மணி புதைகுழியில் முதலாம் கட்ட அகழ்வுப் பணி நிறைவுக்கு வந்ததையடுத்து, இந்த விவகாரம் தொடர்பில் யாழ்ப்பாணம் நீதிமன்றத்தில் அறிக்கைகள் சமர்ப்பிக்கப்பட்டிருக்கின்றன.

நேற்று முன்தினம் செம்மணி விவகாரம் சம்பந்தமான வழக்கு விசாரணை யாழ். நீதிவான் நீதிமன்றத்தில் இடம்பெற்ற போது, கையளிக்கப்பட்டுள்ள அறிக்கைகள் புதைகுழியின் உண்மைத்தன்மையை வெளிப்படுத்துவனவாக அமைந்திருக்கின்றன.

அகழ்வுப் பணியில் ஈடுபட்ட தொல்லியல் பேராசிரியர் ராஜ் சோமதேவ நீதிமன்றத்துக்கு அளித்துள்ள அறிக்கையில், செம்மணி மனித புதைகுழி அடையாளம் காணப்பட்ட பகுதிகளில் குற்றவியல் சம்பவங்கள் இடம்பெற்றமைக்கான தடயங்கள் உள்ளன என தான் கருதுவதாகத் தெரிவித்திருக்கின்றார். அத்துடன் வழமையாக உடல்கள் நல்லடக்கம் செய்வது போன்று அங்கிருந்து மீட்கப்பட்ட எலும்புக் கூட்டுத் தொகுதிகள் காணப்படவில்லை என்றும் அவர் தெரிவித்திருக்கின்றார்.

பேராசிரியர் ராஜ் சோமதேவவின் அறிக்கையில் மூன்று விடயங்கள் சுட்டிக்காட்டப்பட்டுள்ளன. செம்மணி மனித புதைகுழி அடையாளம் காணப்பட்ட குறித்த பகுதியில் குற்றவியல் சம்பவங்கள் இடம்பெற்றமைக்கான தடயங்கள் உள்ளன, வழமையாக உடல்கள் நல்லடக்கம் செய்வது போன்று, புதைகுழியிலிருந்து மீட்கப்பட்ட எலும்புக்கூட்டுத் தொகுதிகள் காணப்படவில்லை, இந்த விடயம் தொடர்பில் மேலதிக ஆய்வுகள் தேவை என்ற கருத்துக்கள் சுட்டிக்காட்டப்பட்டுள்ளன.