ஈஸ்டர் உண்மை தொடக்கமாக அமைய முடியும்

2019 ஈஸ்டர் ஞாயிறு குண்டுத் தாக்குதல்களுக்கு இலங்கை அரசியலுடன் ஓர் உறவுமுறை இருக்கிறது என்ற ஊகம் நீண்டகாலமாகவே இருந்துவருகிறது.

- கலாநிதி ஜெகான் பெரேரா

மூன்று கிறிஸ்தவ தேவாலயங்களிலும் மூன்று ஆடம்பர ஹோட்டல்களிலும் முஸ்லிம் தற்கொலைக் குண்டுதாரிகளினால் அனேகமாக ஏககாலத்தில் நடத்தப்பட்ட தாக்குதல்களில் 270 பேர் பலியானதுடன் 500 க்கும் அதிகமானவர்கள் படுகாயங்களுக்கு உள்ளாகினர். இரு மதங்களுக்கு இடையிலான முரண்நிலை வரலாற்றை இலங்கை கொண்டிருக்கவில்லை என்பதால் அந்தக் குண்டுத் தாக்குதல்களை புரிந்துகொள்ள முடியவில்லை. ஆனால், அந்த படுமோசமான குற்றச்செயல்களினால் பயனடைந்திருக்கக் கூடியவர்கள் யாராக இருக்கும் என்ற அடிப்படையில் அரசியல் நோக்கம் ஒன்று குறித்து சந்தேகிக்கப்பட்டது.

குண்டுத்தாக்குதல்களை தொடர்ந்து அன்று பதவியில் இருந்த அரசாங்கத்துக்கு பெரும் அபகீர்த்தி ஏற்பட்டது. எதிர்க்கட்சியின் ஜனாதிபதி வேட்பாளர் அறிவிக்கப்பட்டார். சில மாதங்களில் நடைபெற்ற தேசிய தேர்தலில் அரசாங்கம் படுதோல்வியடைந்தது.

அன்று இடம்பெற்ற அரசாங்க மாற்றத்துக்கான சூழ்நிலைகளை உருவாக்குவதற்கு முன்னெடுக்கப்பட்ட அரசியல் தந்திரோபாயம் ஒன்றை சபை முதல்வர் பிமல் ரத்நாயக்க கடந்தவாரம் பாராளுமன்றத்தில் வெளியிட்டார். அந்தக் குண்டுத் தாக்குதல்கள் வெறுமனே ஒரு புலனாய்வுத் தோல்வியல்ல, அரசியலில் இருந்தவர்களினால் திட்டமிட்டு மேற்கொள்ளப்பட்ட சூழ்ச்சியின் விளைவாகவே அவை இடம்பெற்றன என்ற சந்தேகத்துடன் பொருந்தியதாக அவரது கருத்துக்கள் இருந்தன.

அரசாங்க உயர்மட்டத்தினால் தெளிவாகவும் உத்தியோகபூர்வமாகவும் இப்போது கூறப்படுவதே அந்த சந்தேகத்தைப் பொறுத்தவரை, புதிய விடயமாகும். “புலனாய்வு அமைப்புகளின் ஊடாக சிங்கள தீவிரவாதக் குழுக்களையும் முஸ்லிம் தீவிரவாதக் குழுக்களையும் தோற்றுவித்து பேணியதன் மூலமாக 2013 ஆம் ஆண்டில் அவர்கள் இதை ஆரம்பித்தார்கள். அதன் முடிவு கேம்பிரிட்ஜ் அனாலிட்டிக்கா சம்பவத்தை ஒத்ததாக இருந்தது" என்று அமைச்சர் பிமல் ரத்நாயக்க கூறினார்.