மனதில் நிறைந்த மருத மடுமாதா

மன்னார் மாவட்டத்தில் மடு என்ற இடத்தில் 400 ஆண்டுகள் பழைமையான செபமாலை மாதாவின் தேவாலயம் அமைந்துள்ளது.

- 

வருடத்தில் ஆத்துமாக்களின் மாதமாகிய நவம்பர் மாதம் தவிர, ஏனைய 11 மாதங்களும் மடுத்திருத்தலத்தில் திருவிழாக்கள் நடைபெறுகின்றன. இருந்த போதிலும் ஜூன், ஜூலை, ஆகஸ்ட் மாதங்களில் நடைபெறும் திருவிழாக்களே சிறப்பானவையாகும். இலட்சக்கணக்கான மக்கள் இன, மத பேதமின்றி கலந்துகொள்வார்கள்.

போர்த்துக்கேயர் இலங்கையில் ஆதிக்கம் செலுத்தத் தொடங்கிய காலத்தில் மன்னார் வியாபார, பிரயாணத்துறைமுகம் எனத் தனிப்பெருமை பெற்றிருந்தது. தென் இந்தியாவில் இருந்து மன்னாருக்கு வந்த அருட்திரு பிரான்சீஸ் சேவியர் அடிகளாரினால் மன்னாரில் மாத்திரமன்றி அதன் சுற்றுக் கிராமங்களுக்கும் கத்தோலிக்க மதம் பரப்பப்பட்டது. மருதமடு மாதாவின் புராதன தலமாகிய மாந்தையும் புராதன கத்தோலிக்க கிராமமாக மாறியது. போர்த்துக்கேயரின் உதவியுடன் மாந்தைக் கத்தோலிக்கர்கள் செபமாலை மாதாவின் பெயரால் ஒரு பெரிய கோவிலைக் கட்டினார்கள்.

1656 ஆம் ஆண்டில் போர்த்துக்கேயருடைய ஆட்சி இலங்கையில் முற்றாக அற்றுப்போக, ஒல்லாந்தர் ஆதிக்கம் செலுத்தத் தொடங்கினர். அவர்கள் கத்தோலிக்கக் கோவில்களைத் தமது இராணுவ பயன்பாட்டுக்காக ஆக்கிரமித்துக் கொண்டார்கள். இதனால் அச்சமடைந்த மாந்தைக் கத்தோலிக்க மக்கள், செபமாலை மாதாவின் சுரூபத்தைப் பாதுகாப்பான வேறொரு இடத்துக்குக் கொண்டுபோக முடிவெடுத்தார்கள். 1670 இல் ஊரவரின் சம்மதத்துடன் இருபது குடும்பங்கள் மாதா சுரூபத்தை எடுத்துக்கொண்டு கண்டி இராச்சியத்துக்குப் புறப்பட்டார்கள். கண்டிக்குப் போகும் பாதையில் பழைய குளமொன்றிருந்தது. அதற்கு அண்மையிலிருந்த கிராமத்துக்குத் தெய்வாதீனமாக 20 குடும்பங்களும் வந்து சேர்ந்தன. அந்தக் கிராமத்தின் பெயர் மருதமடு. அங்கே கண்டியரசனுக்குச் சொந்தமான திறைசேரியுமிருந்தது. அவர்கள் மாதாவுக்கு நன்றி தெரிவிக்கும் முகமாக அன்றைய நாளை செபத்தில் செலவழித்தார்கள். யாழ்ப்பாணத்தில் வேதகலாபனை காட்டுத்தீ போல் பரவியது. மருதமடுவோ அமைதி நிறைந்து காணப்பட்டது.