தப்பித்ததா இலங்கை 30 சதவீதத்தை தாங்கிக் கொள்ள முடியுமா?

மூன்று மாதங்களுக்கு முன்னர் இலங்கை மீது அமெரிக்கா விதித்திருந்த 44 சதவீத இறக்குமதி வரியானது, தற்போது 30 சதவீதமாகக் குறைக்கப்பட்டிருக்கிறது.

- ரொபட் அன்டனி

இது குறித்து அமெரிக்க ஜனாதிபதி டொனால்ட் ட்ரம்ப், ஜனாதிபதி அநுரகுமார திசாநாயக்கவுக்கு ஆகஸ்ட் மாதம் 1ஆம் திகதி முதல் இந்த வரிக் குறைப்பு அமுலுக்கு வரும் என கடிதம் மூலம் அறிவித்திருக்கிறார். இதன் முழுமையான அர்த்தம் என்னவென்றால், இலங்கையிலிருந்து அமெரிக்காவுக்கு ஏற்றுமதி செய்யப்படவிருக்கும் ஆடைகள் உள்ளிட்ட பொருட்களுக்கு 30 சதவீத தீர்வை விதிக்கப்படும்.

இந்த ஆடை உற்பத்திகளை இறக்குமதி செய்யும் அமெரிக்க நிறுவனங்கள், அதன் பெறுமதியில் 30 சதவீதத்தை அமெரிக்க அரசாங்கத்துக்கு வரியாக செலுத்த வேண்டும். இந்த அறிவிப்பு இலங்கையின் ஆடைத் தொழில்துறையில் எந்தளவு தூரம் பாதிப்புகளை ஏற்படுத்தும், எவ்வாறான தாக்கங்கள் உருவாக்கும் என்பதை இங்கு விரிவாக ஆராய வேண்டியது அவசியமாகிறது.

30 சதவீத வரி விதிப்பு ஒரு தற்காலிக நிம்மதியா?

அமெரிக்கா இலங்கைக்கு விதித்திருந்த ஏற்றுமதிகள் மீதான வரியை எந்தளவுக்குக் குறைக்கும் என்று முழு நாடும் எதிர்பார்த்திருந்த நிலையில், தற்போது 30 சதவீதமாக நிர்ணயித்திருக்கிறது. கடந்த ஏப்ரல் மாதம் 2ஆம் திகதி 44 சதவீதமாக விதிக்கப்பட்ட இந்த வரி, 14 சதவீதத்தினால் குறைக்கப்பட்டு 30 சதவீதமாக அறிவிக்கப்பட்டிருக்கிறது. இது ஒருபுறம் சற்று நிம்மதியை அளித்தாலும் மறுபுறம், இந்த 30 சதவீத வரி விதிப்பு இலங்கையின் ஆடை ஏற்றுமதித் துறையில் பாரிய தாக்கங்களை ஏற்படுத்தும் என்று பொருளாதார நிபுணர்கள் கருதுகின்றனர். எனவே, இதனை மேலும் குறைப்பதற்கான நடவடிக்கைகள் எடுக்கப்பட வேண்டும் என்று வலியுறுத்தப்பட்டிருக்கிறது.

நிபுணர்களின் எதிர்வுகூறல்?