நம்பிக்கையை கட்டியெழுப்புவதில் அரசாங்கத்தின் வெற்றி விரிவுபடுத்தப்பட வேண்டியது அவசியம்

இலங்கையின் நவீன வரலாற்றில் இடம்பெற்ற மிகவும் பாரதூரமான பொருளாதார வீழ்ச்சியை வெற்றிகொள்வதற்கு அரசாங்கங்கள் கடந்த மூன்று வருடங்களுக்கும் அதிகமான காலமாக முயற்சித்து வருகின்றன. தற்போதைய அரசாங்கம் மழுப்பலின்றி சர்வதேச நாணய நிதியத்துடன் பேச்சுவார்த்தைகளை நடத்துவதன் மூலமும், இலஞ்ச ஊழல் ஆணைக்குழு, பொலிஸ் மற்றும் நீதிமன்றங்கள் சுயாதீனமாகச் செயற்படுவதற்கு அனுமதிப்பதன் மூலமும் அதன் மீது சர்வதேச பங்காளி களும் பொதுமக்களும் நம்பிக்கை வைக்கக்கூடிய ஒரு சூழ்நிலையை உருவாக்கியிருக்கிறது.

- கலாநிதி ஜெகான் பெரேரா

இந்த நம்பகத்தன்மை முன்னைய அரசாங்கங்கள் இதுகாலவரை பெறத்தவறிய ஒரு வாய்ப்பை இன்றைய அரசாங்கத்துக்கு வழங்குகிறது. இந்த நம்பிக்கையை போரின் மரபுக்கு முகங்கொடுப்பதற்கும் இன்னமும் பிளவுபட்டிருக்கும் நாட்டை ஒன்றுபடுத்துவதற்கும் அரசாங்கத்தினால் பயன்படுத்த முடியும், பயன்படுத்தவும் வேண்டும்.

சர்வதேச நாணய நிதியத்துடனான அரசாங்கத்தின் புதிய உறவுமுறை இந்த நம்பகத்தன்மையின் தெளிவான அறிகுறியாகும். சர்வதேச நாணய நிதியத்தின் நிறைவேற்றுச்சபை கடந்தவாரம் விரிவுபடுத்தப்பட்ட நிதியுதவி திட்டத்தின் நான்காவது மீளாய்வை நிறைவுசெய்து இன்னொரு 350 மில்லியன் அமெரிக்க டொலர்களை இலங்கைக்கு விடுவிப்பதற்கு அதிகாரமளித்திருக்கிறது.

முன்னைய மீளாய்வுகளின்போது செலவின நிலுவைகள் குறித்து அறிவிக்கத் தவறியதை ஒப்புக்கொண்ட அரசாங்கம், அதன் தரவுகளின் நேர்மையை மேம்படுத்துவதற்கு எடுக்கவிருக்கும் நடவடிக்கைகளை விளக்கிக்கூறியதை அடுத்து, அதே அமர்வில் நிறைவேற்றுக்குழு விட்டுக்கொடுப்பைச் செய்திருக்கிறது. அபராதத்தை விதிப்பதற்குப் பதிலாக சர்வதேச நாணய நிதியம் அரசாங்கம் எடுக்கவிருப்பதாகக் கூறிய திருத்த நடவடிக்கைகளையும் நிதித் துறை வெளிப்படைத்தன்மை மீதான ஆழமான பற்றுறுதியையும் ஏற்றுக்கொண்டு சலுகை காட்டியிருக்கிறது.

கடனுதவிகளைப் பெறும் நாடுகள் தவறான தகவல்களை வெளியிடும்போது, சர்வதேச நாணய நிதியம் உதவியை முடக்கி விடும். 2001 ஆம் ஆண்டில் உக்ரேனிலும் 2004 ஆம் ஆண்டில் டொமினிக்கன் குடியரசிலும் அவ்வாறு நடந்தது. ஆனால், இலங்கை விடயத்தில் இந்தத் தடவை அவ்வாறு சர்வதேச நாணய நிதியம் நடந்துகொள்ளாததன் மூலம் சீர்திருத்தம் மீதான அரசாங்கத்தின் உறுதிப்பாட்டில் அதற்கு இருக்கும் நம்பிக்கையை வெளிக்காட்டியிருக்கிறது. வரி அதிகரிப்புகளும் மானியங்கள் வாபஸும் மக்களின் பொருளாதார இடர்பாடுகளை அதிகரித்திருக்கின்றன. ஆனாலும் அரசாங்கம் அத்தகைய நடவடிக்கைகளையே தொடர்ந்து மேற்கொள்கிறது.