நம் தேசத்தின் மீது படிந்திருக்கும் கறையைப் பிரதிபலிக்கிறது செம்மணி

தவறுகளை இலாவகமாக மறைப்பது தேசப்பற்று அல்ல; சட்டத்தரணிகள், செயற்பாட்டாளர்கள் சுட்டிக்காட்டு

- நா.தனுஜா

மனிதப் புதைகுழிகள் கண்டறியப்பட்ட செம்மணியைச் சுற்றி முன்வைக்கப்படும் குற்றச்சாட்டுகள், பாதிக்கப்பட்ட தரப்பினரும் அவர்களது குடும்பத்தினரும் முகங்கொடுத்த துன்பத்தை மட்டுமன்றி, எமது தேசத்தின் மனச்சாட்சி மீது படிந்திருக்கும் கறையையும் சேர்த்தே பிரதிபலிக்கின்றன.

இத்தகைய மிக மோசமான மனித உரிமை மீறல் குறித்த கரிசனையைப் புறக்கணிப்பதோ அல்லது அமைதிகாப்பதோ காயங்களை ஆற்றுவதற்கும், முன்னேறிச் செல்வதற்கும், சர்வதேச சமூகத்தின் நன்மதிப்பைப் பெற்றுக்கொள்வதற்கும் விரும்பும் தேசத்தின் தெரிவாக இருக்காது என சட்டத்தரணிகளும், சிவில் சமூக செயற்பாட்டாளர்களும் சுட்டிக்காட்டியுள்ளனர்.

செம்மணி மனிதப்புதைகுழியின் இரண்டாம் கட்ட அகழ்வின் ஆறாம் நாள் பணிகள் நேற்றுமுன்தினம் செவ்வாய்க்கிழமை முன்னெடுக்கப்பட்டன. அதன்போது கடந்த ஞாயிற்றுக்கிழமை அடையாளம் காணப்பட்ட நீலநிறப்பையுடன்கூடிய சிறு பிள்ளையினது என்று நம்பப்படும் எலும்புக்கூட்டுத்தொகுதி முற்றாக அகழ்ந்து எடுக்கப்பட்டது. அதுமட்டுமன்றி அந்தப் பை மீட்கப்பட்ட புதைகுழியில் இருந்து சிறு பிள்ளைகள் விளையாடும் பொம்மை ஒன்றும், சிறு பிள்ளையின் காலணி ஒன்றும் மீட்கப்பட்டன.

கடந்த ஞாயிறன்று கண்டறியப்பட்ட பையைப் போன்று நேற்று முன்தினம் கண்டறியப்பட்ட பொம்மையும் சமூகவலைத்தளங்களில் முக்கிய பேசுபொருளாகியுள்ளது.

போராளிகள் அல்லாத அப்பாவிச் சிறுவர்களும் கொன்று புதைக்கப்பட்டிருக்கிறார்கள் என நம்புவதற்கு ஏதுவான சான்றுப்பொருட்களாக இவை பார்க்கப்படுவதுடன், முன்னெப்போதுமில்லாத வகையில் இவை தென்னிலங்கையின் கவனத்தையும் பெருமளவுக்கு ஈர்த்துள்ளன.