சந்திரிகா பண்டாரநாயக்க குமாரதுங்க; இலங்கையின் விதியின் புதல்வி

2025 ஜூன் 29 ஆம் திகதி தனது 80 ஆவது பிறந்த தினத்தைக் கொண்டாடிய சந்திரிகா பண்டாரநாயக்க குமாரதுங்க, 1994 நவம்பரில் இலங்கையின் முதலாவது பெண் நிறைவேற்று அதிகார ஜனாதிபதியாகத் தெரிவாகியதன் மூலம் வரலாறு படைத்தவர். சந்திரிகா அல்லது சி.பி.கே. என்று பிரபல்யமாக அறியப்படும் குமாரதுங்க, 1994 ஆம் ஆண்டு ஜனாதிபதி தேர்தலில் 62 சதவீதமான வாக்குகளைப் பெற்றார்.

- டி.பி.எஸ். ஜெயராஜ்

பிறகு, 1999 டிசம்பரில் நடைபெற்ற தேர்தலில் 51 சதவீதமான வாக்குகளுடன் மீண்டும் ஜனாதிபதியாகத் தெரிவானார். அவர் 1994 நவம்பர் தொடக்கம் 2005 நவம்பர் வரை 11 வருடங்களாக ஜனாதிபதியாக பதவியில் இருந்தார்.

ஜனாதிபதியாகத் தெரிவாவதற்கு முன்னர் சந்திரிகா மூன்று மாதங்கள் பிரதமராகவும் பதவி வகித்தார். 1994 ஆகஸ்டில் பிரதமராக பதவியேற்றமை இன்னொரு முக்கியத்துவம் வாய்ந்த உலக சாதனையாக அமைந்தது. தந்தையையும் தாயையும் பிரதமராகக் கொண்ட ஒருவர், பிரதமராக வந்த முதல் சந்தர்ப்பமாகவும் அது வரலாற்றில் பதிவானது. அவரது தந்தையார் எஸ்.டபிள்யூ.ஆர்.டி. பண்டாரநாயக்க 1956 ஆம் ஆண்டு தொடக்கம் 1959 ஆண்டு வரை இலங்கையின் பிரதமராக இருந்தார். தாயார் சிறிமாவோ பண்டாரநாயக்க முதலில் 1960 ஆம் ஆண்டு தொடக்கம் 1965ஆம் ஆண்டு வரையும், அடுத்து 1970 ஆம் ஆண்டு தொடக்கம் 1977 ஆம் ஆண்டு வரையும் பிரதமராகப் பதவி வகித்தார்.

சந்திரிகா குமாரதுங்க ஒரு பிரகாசமான, ஆனால் சர்ச்சைக்குரிய அரசியல் ஆளுமை. மக்கள் மத்தியில் ஒரு கலப்பான பிரதிபலிப்புக்களை அவர் ஏற்படுத்தினார். சிலர் அவரை நேசித்து மெச்சினார்கள் ... அதேவேளை, வேறு சிலர் அவரை வெறுத்தார்கள். சந்திரிகா செய்த காரியங்கள் பலவற்றுக்கும் செய்யாத காரியங்கள் பலவற்றுக்கும் குற்றப் பொறுப்புடையவர். மக்களினால் தேர்தல் ஒன்றில் தெரிவு செய்யப்பட்டு பதவிக்கு வந்த அரசியல் தலைவர், ஒவ்வொருவரையும் பொறுத்தவரை இது உண்மையே. தேர்தல் பிரசாரங்கள் அலங்காரக் கவிதை நடையில் இருக்கின்ற அதேவேளை, ஆட்சிமுறை கடினமான உரைநடையில் காணப்படுகிறது.

சந்திரிகா 1994 ஆம் ஆண்டில் அதிகாரத்துக்கு தெரிவு செய்யப்பட்டபோது, ஒரு சமாதானத் தேவதை என்று போற்றப்பட்டார். சமாதானத்தையும் நல்லிணக்கத்தையும் கொண்டு வரப் போவதாகக் கூறியே அவர் மக்களிடம் வாக்குக் கேட்டார். ஜனாதிபதி சந்திரிகா தமிழீழ விடுதலைப் புலிகளுடனான கொடூரமான போரை முடிவுக்குக் கொண்டுவந்து, பேச்சுவார்த்தை மூலமாக இணக்கத் தீர்வொன்றைக் காண்பதன் மூலமாக நிலைபேறான சமாதானத்தை ஏற்படுத்துவார் என்று எதிர்பார்க்கப்பட்டது. ஆனால், ஒரு குறுகியகால மோதல் ஓய்வுக்குப் பிறகு, போர் கவலைக்குரிய வகையில் மீண்டும் மூண்டது.