பழைமை பேணும் கோட்டை நகரம்

இலங் இலங்கையின் தென் மேற்கு முனையில் அமைந்திருக்கிறது காலி நகரம். 16ஆம் நூற்றாண்டில் போர்த்துக்கேயர் கைக்கு வருமுன் கிம்கதித்த என அழைக்கப்பட்டது.

- 

அப்போது காலி பிரதான துறை முகமாக விளங்கியது. டச்சு காலனித்துவ ஆட்சியின்போது காலி உச்ச அபிவிருத்தியைக் கண்டது.

இங்குள்ள பிரதான நதி ஜின்கங்கை யாகும். இது ஜிந்தோட்டவில் கடலுடன் கலக்கிறது. 2004ஆம் ஆண்டு டிசம்பர் மாதம் 26ஆம் திகதி ஏற்பட்ட கடற்கோளினால் (சுனாமி) காலி நகரில் பல்லாயிரம் பேர் கொல்லப்பட்டனர்.

கடலுக்குள் பாறைகள் இயற்கை அரணாக அமைய ஐரோப்பியர் கட்டிய கோட்டைக்கு காலி ஒரு சிறந்த உதாரணமாகும். இதில் ஐரோப்பியக் கட்டடக்கலையும் தெற்காசிய மரபுகளும் இணைந்துள்ளன. காலி கோட்டையைப் பாதுகாக்கப்பட வேண்டிய உலக புராதன இடமாக யுனெஸ்கோ 1988ஆம் ஆண்டு அங்கிகரித்துள்ளது. இக் கோட்டை இலங்கையின் பெரும்பாலான கோட்டைகள் போன்று கடலும் நிலமும் உள்ள சிறிய குடாப் பகுதியில் கட்டப்பட்டிருக்கிறது. கோட்டைக்கு அருகில் கடலில் பெரும் பாறைகள் உள்ளன.

காலியில் உள்ள வேறு முக்கியமான இடங்களாக, புனித மரியாள் பேராலயம், சிவன் கோவில், அமன்கல்ல என்னும் வரலாற்று ரீதியான உல்லாச ஹோட்டல் ஆகியன விளங்குகின்றன.

தென்னிலங்கையில் பிரதான நகரமாக விளங்கும் இந்நகரில் சுமார் ஒரு இலட்சம் பேர் வாழ்கிறார்கள். இவர்களில் சிங்கள மக்கள் பெரும்பான்மையாகவும் சிறுபான்மையாக முஸ்லிம்களும் மிகச் சிறிய எண்ணிக்கையில் தமிழர்களும் வசிக்கிறார்கள்.

கொழும்பில் இருந்து இந்நகரை இணைத்து மாத்தறை வரை கடலோரப் புகையிரதப் பாதை காணப்படுகிறது. சர்வதேச கிரிக்கெட் மைதானமும் நகரின் மத்தியில் உள்ளது. காலி பழைமையைப் பேணிப் போற்றும் அதேவேளை, உல்லாசப் பயணிகளின் சொர்க்கபுரியாகவும் சர்வதேச ரீதியில் புகழ் பெற்று விளங்குகிறது.

காலிக் கோட்டைக்குக் கிழக்குப் பகுதியில் றுமஸ்ஸல்லகந்த என்ற மிகப் பெரிய மலை காணப்படுகிறது. இராமாயணத்தில் இடம்பெற்ற சில சம்பவங்களுடன் இம்மலை தொடர்புடையது என உள்ளூர் கர்ணபரம்பரைக் கதைகள் கூறுகின்றன.