மக்கள் வங்கி தனது 64வது ஆண்டு நிறைவைக் கொண்டாடுகிறது

இலங்கையின் வங்கிச்சேவை மற்றும் நிதித் துறையில் புதியதொரு பரிமாணத்தை நிலைநாட்டிய மக்கள் வங்கி, ஜூலை 01 ஆம் திகதியன்று அறுபத்து நான்கு ஆண்டுகள் சேவையின் நிறைவைக் கொண்டாடுகிறது. இந்த நாட்டில் பொது மக்களுக்கு வங்கிச் சேவையை அறிமுகப்படுத்திய மக்கள் வங்கி, தற்போது நாட்டின் கிராமப்புறங்களுக்கு டிஜிட்டல் நிதிச்சேவைகளை விரிவுபடுத்துவதன் மூலம் முழு நாட்டிற்கும் டிஜிட்டல் மயமாக்கலின் நன்மைகளைக் கொண்டுவருவதற்கான முன்னோடிப் பணியில் ஈடுபட்டுள்ளது என்பது ஒரு தனித்துவமான உண்மை.

- 

1961ம் ஆண்டு சட்டமூலம் 29 இன் கீழ் மக்கள் வங்கி ஸ்தாபிக்கப்பட்டதுடன், கூட்டுறவு இயக்கம் மற்றும் கிராமிய வங்கிச்சேவை முறைமை ஆகியவற்றை மேம்படுத்தி, இலங்கையில் கிராமப்புற மக்களுக்கு சேவைகளை வழங்கும் நோக்குடனேயே இது ஆரம்பிக்கப்பட்டது. அப்போது பிரதமராக சேவையாற்றிய மேன்மைதங்கிய ஸ்ரீமாவோ பண்டாரநாயக்க அவர்களிடம் அப்போதைய வாணிப, உணவு, கூட்டுறவு, கப்பல்துறை விவகாரங்கள் அமைச்சரான கௌரவ ரி.பி. இலங்கரட்ண அவர்களால் இச்சட்டமூலம் பாராளுமன்றத்தில் சமர்ப்பிக்கப்பட்டது. அச்சமயம் கூட்டுறவுத் துறையில் அளப்பெரிய சேவைகளை ஆற்றிவந்த திரு.வின்சென்ட் சுபசிங்க அவர்கள் மக்கள் வங்கியின் முதலாவது தலைவராக செயற்பட்டார்.

மக்கள் வங்கியின் உதயமானது, ஆங்கிலம் பேசும் அறிவு படைத்த வகுப்பினருக்கு மாத்திரம் மட்டுப்படுத்தப்பட்டிருந்த வங்கிச்சேவை முறைமையின் எல்லைகளைத் தகர்த்து, அனைவரையும் எட்டுவதற்கு வழிவகுத்தது. இதன் விளைவாக, சிங்கள மற்றும் தமிழ் மொழிகளில் சேவைகளை வழங்குவதற்கு ஆரம்பித்த முதலாவது வங்கியாக மக்கள் வங்கி மாறியது.

சாதாரண மக்கள் மத்தியில் சேமிப்புப் பழக்கத்தை ஊக்குவிப்பதற்காக 1961ம் ஆண்டில் தங்க அடகு சேவைகளை மக்கள் வங்கி அறிமுகப்படுத்தியது. அதுவரையில் முறைசாரா சந்தையாகக் காணப்பட்ட தங்க அடகு சேவை, அரச வங்கியொன்றின் பாதுகாப்புடன், நியாயமான வட்டி வீதங்களுடன் தங்க அடகு சேவையாக மாற்றம் பெற்றது.