இஸ்ரேல்-ஈரான் போர் நிறுத்தம்

இஸ்ரேலுக்கும் ஈரானுக்குமிடையில் போர் நிறுத்தமொன்று தற்போது முதல் அமுலாவதாக அமெரிக்க ஜனாதிபதி டொனால்ட் ட்ரம்ப் நேற்று செவ்வாய்க்கிழமை அறிவித்துள்ளார்.

- 

இஸ்ரேலுக்கும் ஈரானுக்குமிடையில் 12 நாட்களாக இடம் பெற்ற உக்கிர மோதல் மத்திய கிழக்கு முழுவதும் பரவலாம் என அச்சம் ஏற்பட்டுள்ள நிலையில் மேற்படி அறிவிப்பு வெளியாகியுள்ளது.

ஈரானிடமிருந்தான அணுசக்தி அச்சுறுத்தல் நீக்கப்பட்டதையடுத்து போர் நிறுத்த உடன்படிக்கைக்கு தாம் இணங்கியுள்ளதாக இஸ்ரேல் கூறுகிறது. இஸ்ரேல் போர் நிறுத்தத்துக்கு இணங்குமானால் தாம் போரை நிறுத்துவதாக ஈரான் ஏற்கனவே தெரிவித்திருந்தது.

இந்நிலையில் இஸ்ரேல் போர் நிறுத்தம் தொடர்பில் அறிவித்ததையடுத்து ஈரானின் அதி உயர் பாதுகாப்பு அமைப்பான உச்ச தேசிய பாதுகாப்பு சபை யூத எதிரிக்கும் அதனது ஆதரவாளர்களுக்கும் எதிரான போர் நிறுத்தத்தை அமுல்படுத்த தேசிய தீர்மானம் எடுக்கப்பட்டுள்ளதாக தெரிவித்து அறிக்கையொன்றை வெளியிட்டுள்ளது.

கட்டாரிலுள்ள அமெரிக்கத் தளத்தின் மீது ஈரான் வெற்றிகரமாக தாக்குதல் நடத்தியதையடுத்து யுத்த நிறுத்தமொன்று அமுல்படுத்தப்பட்டுள்ளதாக ஈரானிய அரசாங்க ஊடகம் அறிக்கையிட்டுள்ளது. அந்தத் தாக்குதல் குறித்து கட்டார் தெரிவிக்கையில், ஈரானால் ஏவப்பட்ட அனைத்து ஏவுகணைகளும் குறுக்கீடு செய்யப்பட்டதாக குறிப்பிட்டுள்ளது.

அமெரிக்கா கடந்த சனிக்கிழமை ஈரானிலுள்ள அணுசக்தி நிலையங்கள் மீது தாக்குதல் நடத்தியமைக்கு பதிலடி நடவடிக்கையாகவே ஈரான் அமெரிக்க வான் படைத்தளமொன்றின் மீது ஏவுகணைத் தாக்குதலை நடத்தியதாக கூறப்படுகிறது.

போர் நிறுத்தம் தொடர்பான அறிவிப்பானது அந்தப் பிராந்தியமெங்குமுள்ள மக்களுக்கு பெரும் ஆறுதலைத் தருவதாக அமைந்துள்ளதாக அங்கிருந்து வரும் செய்திகள் தெரிவிக்கின்றன. எனினும் போர் நிறுத்த அமுலாக்கத்தின் பின்னரும் ஈரானும் இஸ்ரேலும் பரஸ்பரம் தாக்குதல்களில் ஈடுபட்டதாக வெளியாகும் தகவல்கள் கவலை தருவதாக உள்ளதாக கூறப்படுகிறது.

இந்நிலையில் அமெரிக்க ஜனாதிபதி டொனால்ட் ட்ரம்ப் ஈரான் மீது இஸ்ரேல் குண்டுவீச்சு எதனையும் நடத்தக்கூடாது எனவும் அது யுத்த நிறுத்த உடன்படிக்கை தொடர்பான பிரதான மீறலாக அமையும் எனவும் எச்சரிக்கை விடுத்துள்ளார்.